راولپنڈی: اے این ایف نے 7 مختلف کارروائیوں میں 4 کروڑ 80 لاکھ روپے مالیت کی 210 کلو گرام سے زائد منشیات برآمد کر کے خاتون سمیت 8ملزمان کو گرفتار کرلیا۔
ترجمان کے مطابق علامہ اقبال انٹرنیشنل ایئرپورٹ لاہور پر کارروائی کے دوران عمرہ پر جانے والے ایک مسافر کے سامان سے 2.522 کلو زینیکس گولیاں برآمد ہوئیں اور ملزم کو موقع پر گرفتار کر لیا گیا، باچا خان انٹرنیشنل ایئرپورٹ پشاور پر قطر جانے والے مسافر سے 994 گرام آئس برآمد ہوئی۔
رنگ روڑ پشاور کے قریب ایک گاڑی سے 20کلو ہیروئن برآمد ہوئی اور 2 افراد کو حراست میں لے لیا گیا، جب کہ آر سی ڈی روڈ، حب کے قریب کارروائی میں 5 کلو آئس پکڑی گئی اور مزید 2 ملزمان گرفتار ہوئے۔
بھیرہ انٹرچینج کے قریب کارروائی کے دوران ایک گاڑی سے 102کلو چرس اور 42 کلو افیون برآمد ہوئی، جبکہ مندرہ ٹول پلازہ کے قریب گاڑی سے 36 کلو چرس ضبط کر کے خاتون سمیت 2 ملزمان کو گرفتار کیا گیا۔
ترجمان کے مطابق تمام گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات شروع کر دی گئی ہیں۔
