اسلام آباد: بانی پی ٹی آئی عمران خان نے نااہلی معاملے بارے اپیل کی جلد سماعت کیلئے درخواست سپریم کورٹ میں دائر کردی۔ تفصیلات کے مطابق بانی پی ٹی آئی عمران خان نے بیرسٹر علی ظفر کے توسط سے نا اہلی معاملے بارے اپیل کی جلد سماعت کیلئے درخواست سپریم کورٹ میں دائرکردی۔ دائر دخواست میں موقف اپنایا گیا کہ بانی پی ٹی آئی کو سیاست سے باہر رکھنے کی کوشش کی جا رہی ہے، عمران خان کو الیکشن کمیشن نے سپیکر قومی اسمبلی کے ریفرنس پرمیانوالی سے ڈی سیٹ کیا اور الیکشن کمیشن فیصلے پر انہیں انتخاب لڑنے سے روک دیا گیا۔
درخواست میں کہا گیا ہے کہ لاہور ہائیکورٹ لارجر بینچ الیکشن کمیشن کیخلاف اپیل پر سماعت کر رہا تھا لیکن اسلام آباد ہائیکورٹ نے اپیل واپس لینے کی استدعا منظور کرنے سے انکار کر دیا۔
اسلام آباد ہائیکورٹ کے حکم کی وجہ سے لاہور ہائیکورٹ لارجر بینچ کارروائی آگے نہیں بڑھا پا رہا۔استدعا ہے کہ اسلام آباد ہائی کورٹ فیصلے کیخلاف اپیل کو جلد سماعت کیلئے مقرر کیا جائے۔
