پشاور:مشیر اطلاعات خیبرپختونخوا بیرسٹر سیف نے کہا ہے کہ جعلی حکومت نے بغض عمران میں انٹرنیٹ کا ستیاناس کردیا ہے،آئی ٹی شعبے سے وابستہ بزنس کمیونٹی کا اربوں روپے کا نقصان ہو رہا ہے، انٹرنیٹ بارے وزراء کے بیانات میں بھی مماثلت نہیں ہے۔
تفصیلات کے مطابق ایک بیان میں مشیر اطلاعات خیبرپختونخوا محمد سیف نے کہا کہ آئی ٹی شعبے سے وابستہ بزنس کمیونٹی کا اربوں روپے کا نقصان ہورہا ہے، بغض بانی پی ٹی آئی میں جعلی حکومت نے انٹرنیٹ کا بھی ستیاناس کردیا ہے۔
انہوں نے کہا کہ مینڈیٹ چور حکومت کے کانوں پرجوں تک نہیں رینگتی، انٹرنیٹ بارے وزراء کے بیانات میں بھی مماثلت نہیں۔انہوں نے کہا کہ ایک وزیر کہتا ہے فائر وال لگی ہے، دوسرا کہتا نہیں لگی، ایک وزیر کہتا ہے زیرسمندر کیبل کٹ گئی ہے، دوسرا کچھ اور کہتا ہے۔
انہوں نے کہا کہ آئی ٹی کی وزیر نے تو بے وقوفی کی انتہاء کی ہے، محترمہ کہتی ہیں کہ وی پی این سے نیٹ سست ہوا۔ انہوں نے کہا کہ نیٹ ٹھیک ہو تو کسی کا دماغ خراب ہے کہ وی پی این لگائے، ان سے ایسے ہی بیانات کی توقع کی جا سکتی ہے۔
