نیویارک: امریکا کے شہر نیویارک کے مرکزی علاقے مین ہیٹن ایک بلند و بالا عمارت میں ایک مسلح شخص کی جانب سے فائرنگ کے نتیجے میں ایک پولیس افسر سمیت 4 افراد ہلاک جبکہ ایک زخمی ہو گیا ، جس کو انتہائی تشویشناک حالت میں ہسپتال منتقل کر دیا گیا۔
غیر ملکی میڈیا کے مطابق پولیس کمشنر جیسیکا ٹش کے مطابق حملہ آور کو ایک سی سی ٹی وی فوٹیج میں ایک سیاہ بی ایم ڈبلیو کار سے ایم-4 رائفل کے ساتھ اترتے ہوئے دیکھا گیا، جس کے بعد وہ 345 پارک ایونیو پر واقع عمارت میں داخل ہوا اور فورا ہی ایک پولیس افسر کو نشانہ بنایا، اس کے بعد اس نے عمارت کی لابی میں اندھا دھند فائرنگ کی، حملہ آور 33ویں منزل تک لفٹ کے ذریعے گیا، جہاں روڈن مینجمنٹ کے دفاتر واقع ہیں، وہاں بھی اس نے فائرنگ کا سلسلہ جاری رکھا اور پھر مبینہ طور پر خود کو گولی مار لی، بعد ازاں پولیس اہلکاروں کو وہ اپنی رائفل کے قریب مردہ حالت میں ملا۔
انہوں نے حملہ آور کی شناخت لاس ویگاس کے رہائشی شین تمورا کے طور پر کی اور بتایا کہ اس کی گاڑی سے ایک ریوالور، گولیاں، میگزینز اور اس کے نام کی ادویات برآمد ہوئیں، لاس ویگاس پولیس کے مطابق اس شخص کا ماضی میں ذہنی صحت کے مسائل سے تعلق رہا ہے، لیکن نیواڈا میں اس کے پاس اسلحہ رکھنے کا درست اجازت نامہ موجود تھا۔
