لندن: انگلینڈ کرکٹ ٹیم کے مایہ ناز بلے باز جوروٹ نے کہا ہے کہ ہم بھارتی ٹیم کے خلاف سیریز جیتنے کے لئے پرعزم ہیں، ہماری ٹیم مکمل طور پر فٹ اور بھر پور فارم میں ہے، پانچویں اور آخری ٹیسٹ میچ میں بھارتی ٹیم کے خلاف اپنی کارکردگی کے تسلسل کو برقرار رکھتے ہوئے اپنی ٹیم کی فتح میں اہم کردار ادا کریں گے۔
اپنے ایک بیان میں جو روٹ نے کہا ہے کہ بھارت کے خلاف چوتھے ٹیسٹ کی پہلی اننگز میں 150رنز کی اننگز کھیل کر بہت خوش ہوا،لیکن میچ ڈرا ہوگیا تاہم میں پرامید ہوں کہ ان کی ٹیم پانچویں اور آخری ٹیسٹ میں بھی عمدہ کھیل پیش کرتے ہوئے نہ صرف فتح حاصل کرے گی بلکہ سیریز کا اختتام بھی 3-1سے کرے گی۔
انہوں نے کہا کہ ان کی ٹیم نے پانچویں ٹیسٹ میچ کے لئے حکمت عملی تیار کر لی ہے جس کے مطابق تیاری کی جا رہی ہے۔انہوں نے کہا کہ سیریز جیتنا ہدف ہے اور مقصد کے حصول کیلئے سخت محنت کریں گے۔ پانچویں ٹیسٹ کی دلچسپ بات یہ ہے کہ بھارت کو سیریز برابر کرنے کے لئے یہ میچ جیتنا لازمی ہوگا جبکہ انگلینڈ کو سیریز اپنے نام کر نے کے لئے یہ میچ کم از کم ڈرا کھیلنا ہوگا۔
واضح رہے کہ انگلینڈ اور بھارت کی کرکٹ ٹیموں کے درمیان پانچواں اور آخری ٹیسٹ میچ 31 جولائی سے کیننگٹن اوول، لندن میں شروع ہوگا۔
