نیو یارک: وزیر خارجہ اسحاق ڈار نے واضح کیا ہے کہ پاکستان کا اسرائیل کو تسلیم کرنے کا کوئی منصوبہ نہیں، سندھ طاس معاہدے کی معطلی غیر قانونی، پانی روکنا یا رخ موڑنا اعلان جنگ تصور کیا جائے گا۔
نیویارک میں پریس کانفرنس کرتے ہوئے اسحاق ڈار نے کہا کہ یو این کانفرنس میں پاکستان کی جانب سے بھرپور بیان دیا ہے، ہم نے فلسطین کیساتھ کشمیر کے مسئلے کو بھی اجاگر کیا۔ انہوں نے کہا کہ پاکستان فلسطین کے دو ریاستی حل کی حمایت کرتا ہے، ہمارا اسرائیل کو تسلیم کرنے کا کوئی منصوبہ نہیں ہے۔
انہوں نے کہا کہ فلسطینی سرزمین پر اسرائیلی قبضہ فوری ختم ،غزہ میں جنگ بندی ہونی چاہئے۔ انہوں نے کہا کہ او آئی سی 57ممالک کی تنظیم ہے جس کے ہم بانی ممبر ہیں، اسلاموفوبیا پر او آئی سی کا مستقبل مندوب مقرر کروایا ہے۔ انہوں نے کہا کہ امریکہ کا دورہ ہر حوالے سے کامیاب رہا ہے، امریکی وزیر خارجہ سے ملاقات بہت مفید رہی ہے، ہم نے تجارت اور ٹیرف سے متعلق بات کی ہے۔ انہوںنے کہا کہ ٹیرف پر معاہدے کیلئے وزیر خزانہ محمد اورنگزیب جلد امریکا پہنچیں گے۔
انہوں نے بتایا کہ ہم نے باور کرایا ہے کہ مسئلہ کشمیر حل اور مذاکرات کے بغیر خطے میں امن ممکن نہیں، بھارت کیساتھ جنگ بندی کی پیشکش میں ڈائیلاگ کی بھی بات ہوئی تھی۔ انہوں نے کہا کہ بھارت کے ساتھ ڈائیلاگ ہوگا تو جامع ہوگا، بھارت جب بھی کمپوزٹ ڈائیلاگ کرنا چاہے ہم تیار ہیں۔انہوں نے کہا کہ بھارت سندھ طاس معاہدے کو یکطرفہ طور پر ختم نہیں کرسکتا، تین دریاؤں پر ہمارا حق ہے، پانی روکنا یا، رخ موڑ ناقبول نہیں کریں گے، اسے اعلان جنگ سمجھا جائے گا۔
انہوں نے بتایا کہ فیلڈ مارشل عاصم منیر کی قیادت میں پاک فوج امن کیلئے کوشاں ہے۔ انہوں نے بتایا کہ امریکہ میں سعودی عرب، برطانیہ، بنگلادیش، کویت، فلسطین کے ساتھ دو طرفہ ملاقاتیں ہوئی ہیں۔
