اسلام آباد: وزیراعظم شہباز شریف نے پاکستان اور کرغزستان کے درمیان تعاون میں پیشرفت پر اظہار اطمینان کرتے ہوئے آئی جی سی کے دوران کئے گئے فیصلوں پر عملدرآمد کیلئے پاکستان کے مضبوط عزم کا اعادہ کیا ہے۔
جاری بیان کے مطابق منگل کو وزیراعظم سے کرغزستان کے ایک اعلی سطحی وفد نے کابینہ کے ڈپٹی چیئرمین عادل بیسالوف کی قیادت میں ملاقات کی جس کا مقصد متعدد شعبوں میں دوطرفہ تعاون کو مضبوط بنانا ہے۔ وزیر اعظم نے وفد کا خیر مقدم کیا اور آئی جی سی کے پانچویں اجلاس کے کامیاب انعقاد پر اطمینان کا اظہار کیا۔
وزیراعظم نے پاکستان اور کرغزستان کے درمیان پروٹوکول اور مفاہمت کی متعدد یادداشتوں پر دستخط کو سراہا اور انہیں تجارت، توانائی، تعاون، روابط اور عوامی تبادلوں کے فروغ کی جانب اہم قدم قرار دیا۔وزیر اعظم نے آئی جی سی کے دوران کئے گئے فیصلوں پر عمل درآمد کیلئے پاکستان کے مضبوط عزم کا اعادہ کیا اور معاہدوں کو ٹھوس نتائج میں تبدیل کرنے کیلئے ان کی موثر و بروقت پیروری کی اہمیت پر زور دیا۔
اس موقع پر عادل بیسالوف نے دونوں ممالک کے مابین قریبی دوطرفہ تعلقات کو فروغ دینے کیلئے حکومت پاکستان کی کوششوں کو سراہا اور اس اعتماد کا اظہار کیا کہ آئی جی سی کے نتائج گہرے اور مزید نتیجہ خیز تعاون کا باعث بنیں گے۔بیان کے مطابق دونوں رہنمائوں نے پاکستان اور کرغزستان کی عوام کے باہمی فائدے کیلئے مل کر کام کرنے اور دونوں ممالک کے مابین مضبوط تعلقات کیلئے تعاون جاری رکھنے کے عزم کا اعادہ کیا۔
