نیو یارک: پاکستان اور کویت نے اقوام متحدہ اور او آئی سی سمیت کثیرجہتی فورمز پر قریبی تعاون جاری رکھنے کا عزم ، دوطرفہ روابط کو مزید گہرا کرنے کیلئے اعلی سطحی تبادلوں کے جلد انعقاد پر اتفاق کیا ہے۔
دفتر خارجہ کے مطابق اقوام متحدہ میں فلسطین کے 2 ریاستی حل سے متعلق عالمی کانفرنس کے موقع پرنائب وزیراعظم اسحاق ڈار نے کویت کے وزیر خارجہ عبداللہ الیحیی سے ملاقات کی۔ دونوں رہنمائوں نے دوطرفہ تعلقات مزید مضبوط بنانے پر تبادلہ خیال کیا اور تجارت، سرمایہ کاری، توانائی، غذائی تحفظ اور دفاع کے شعبوں میں تعاون بڑھانے پر زور دیا۔
اسحاق ڈار اور کویتی وزیر خارجہ نے اقوام متحدہ اور او آئی سی سمیت کثیرجہتی فورمز پر قریبی تعاون جاری رکھنے کے عزم کا اعادہ کیا، دونوں رہنمائوں نے دوطرفہ روابط کو مزید گہرا کرنے کیلئے اعلی سطحی تبادلوں کے جلد انعقاد پر اتفاق کیا ۔دفتر خارجہ کے مطابق دونوں رہنمائوں نے غزہ میں اسرائیلی جارحیت اور بگڑتی انسانی صورتحال پر تشویش کا اظہار کرتے ہوئے مسئلہ فلسطین کے منصفانہ و دیرپا حل کی ضرورت پر زور دیااور امید ظاہر کی کہ نیویارک کانفرنس کے نتائج 2ریاستی حل کے عملی نفاذ میں مددگار ثابت ہوں گے۔
