ایچ بی ایل پی ایس ایل 10 کے سنسنی خیز مقابلے دیکھنے کے لیے ٹکٹوں کی فروخت 3 اپریل سے شروع ہوگی۔ شائقین کرکٹ جمعرات کو سہ پہر 3 بجے سے PCB.tcs.com.pk پر آن لائن ٹکٹ خرید سکیں گے، جبکہ فزیکل ٹکٹ 7 اپریل سے ملک بھر کے ٹی سی ایس ایکسپریس سینٹرز پر دستیاب ہوں گے۔
آن لائن خریدی گئی ٹکٹیں شائقین ٹی سی ایس کے مقرر کردہ پک اپ مراکز سے حاصل کر سکتے ہیں یا ٹی سی ایس کے ذریعے گھر پر ڈیلیوری کی سہولت بھی دستیاب ہوگی۔
ایچ بی ایل پی ایس ایل کا دسویں ایڈیشن چار شہروں کراچی، لاہور، ملتان اور راولپنڈی میں کھیلا جائے گا، جبکہ فائنل 18 مئی کو قذافی اسٹیڈیم لاہور میں ہوگا۔
پی ایس ایل کے چاروں وینیوز پر عام ٹکٹ 650 روپے میں دستیاب ہوں گے، جبکہ اسلام آباد یونائیٹڈ اور لاہور قلندرز کے درمیان راولپنڈی کرکٹ اسٹیڈیم میں افتتاحی میچ کے ٹکٹ 1000 سے 8500 روپے تک دستیاب ہوں گے۔
پاکستان کرکٹ بورڈ (پی سی بی) نے شائقین کی دلچسپی بڑھانے کے لیے ہر میچ میں ایک ٹکٹ ریفل کا بھی اعلان کیا ہے، جس کے تحت شائقین کو دلچسپ انعامات جیتنے کا موقع ملے گا۔ اس حوالے سے مزید تفصیلات جلد جاری کی جائیں گی۔
