امریکی ریاست کیلیفورنیا کے شہر لاس اینجلس میں بے گھر افراد کے خیمے دیکھے جاسکتے ہیں۔ (شِنہوا)
واشنگٹن(شِنہوا)امریکی محکمہ تعمیرات و شہری ترقی (ایچ یو ڈی) کی جاری کردہ ایک رپورٹ کے مطابق 2023 کے مقابلے میں 2024 میں امریکہ میں بے گھر افراد کی تعداد میں 18 فیصد اضافہ ہوا ہے جس کی وجہ قومی سطح پر سستے مکانات کا بحران، بڑھتا افراط زر اور تارکین وطن کی تعداد میں اضافہ ہے۔
رپورٹ میں بتایا گیا ہے کہ صرف جنوری 2024 کی ایک رات کو 7 لاکھ 70 ہزار سے زائد بے گھر تھے۔ یہ تعداد 2023 کے مقابلے میں 18 فیصد زیادہ ہے۔
ایچ یو ڈی ایجنسی کی سربراہ ایڈرین ٹوڈ مین کا کہنا ہے کہ اگرچہ یہ اعداد و شمار تقریباً ایک برس پرانے ہیں جو موجودہ صورتحال کی عکاسی نہیں کرتے تاہم یہ اہم ہے کہ ہم بے گھر ہونےکا مسئلہ روکنے اور اسے ختم کرنے کے لئے شواہد پر مبنی کوششوں پر توجہ مرکوز کریں۔
رپورٹ کے مطابق اس تاریخی بلند ترین تعداد میں ممکنہ طور پر کئی عوامل کارفرما ہیں۔ قومی سطح پر سستے مکانات کے بحران، بڑھتے ہوئے افراط زر، متوسط اور کم آمدنی والے گھرانوں کی تنخواہوں میں کمی اور منظم نسل پرستی کے مسلسل اثرات نے بے گھر ہونے کا مسئلہ اس مقام تک پہنچادیا ہے۔
