امیر جماعت اسلامی حافظ نعیم الرحمن نے کہا ہے کہ گردن تک کرپشن میں ڈوبی حکمران اشرافیہ وسائل پر قابض، مشن آئین، اداروں اور عوام کا حلیہ بگاڑنا ہے، 26 ویں آئینی ترمیم کیخلاف سپریم کورٹ،بجلی بلوں پر عوامی عدالت میں جائیں گے،عوام کو متحد ہو کر مسلط حکمرانوں کو اٹھا کر باہر پھینکنا ہو گا۔سرگودھا میں جلسے سے خطاب کرتے ہوئے امیر جماعت اسلامی حافظ نعیم الرحمن نے کہا کہ ملک گیر ریفرنڈم کے بعد ’حق دو عوام کو‘تحریک کا اہم مرحلہ شروع ہو گا۔
انہوں نے کہا کہ گردن تک کرپشن میں ڈوبی ہوئی حکمران اشرافیہ وسائل پر قابض ہے،یہ لوگ ٹیکس بھی نہیں دیتے، انہوں نے مل کر قومی اداروں کو تباہ کیا، عوام پر آئی پی پیز اور مہنگائی کا عذاب مسلط کیا، فارم 47پر مسلط حکمرانوں کا آئین، اداروں اور عوام کا حلیہ بگاڑنا مشن ہے۔انہوں نے کہا کہ عدلیہ پر قبضہ جمانے سے عام آدمی کیلئے انصاف کا حصول مزید مشکل ہو جائے، عوام کو متحد ہو کر مسلط حکمرانوں کو اٹھا کر باہر پھینکنا ہو گا۔
انہوں نے کہا کہ بلوں کے بائیکاٹ کیلئے ریفرنڈم کرائیں گے، حکمرانوں کو بتا دینا چاہتا ہوں کہ اگر آئی پی پیز کو لگام نہیں دینگے تو قوم بل بھی ادا نہیں کرے گی۔ انہوں نے کہا کہ ہمارے بچوں کو کوالٹی ایجوکیشن تک میسر نہیں، سکولوں کو بھی این جی اوز کے سپرد کیا جا رہا ہے، جماعت اسلامی اس ظلم کیخلاف مزاحمت کرے گی۔ انہوں نے کہا کہ چوکوں، چوراہوں میں کرپٹ حکمرانوں کو ایکسپوز کریں گے،
عوامی بیداری اور انہیں منظم کرنے کیلئے حق دو تحریک برپا کی ہے۔انہوں نے کہا کہ عوام مایوس نہ ہوں، فلسطینیوں سے جینے کا سبق سیکھیں، مایوس ہو کر بیٹھنے سے حکمرانوں کو لوٹ مار کی کھلی چھٹی مل جائے گی، عوام جماعت اسلامی کی تحریک کا حصہ بنیں اور ملک میں انقلاب لائیں۔ انہوں نے کہا کہ حق دو تحریک آئی پی پیز کے خلاف برپا کی ہے اسی کی برکت سے پانچ آئی پی پیز معاہدے منسوخ ہوئے، آنیوالے دنوں میں مزید معاہدے ختم ہوں گے۔
