بیجنگ: چین اور یورپ کے درمیان خلائی مشن کا ایک نیا سنگ میل عبور کرتے ہوئے شمسی ہوا کی تحقیقات کے لیے تیار کردہ سیٹلائٹ کے چین میں تمام ترقیاتی کام مکمل کرلیے گئے۔
سولر ونڈ میگنیٹوسفیئر آئنوسفیئر لنک ایکسپلورر (سمائل ) سیٹلائٹ چین کی اکیڈمی آف سائنسز( سی اے ایس) اور یورپی خلائی ایجنسی ( ای ایس اے) کا مشترکہ مشن ہے جس کا مقصدشمسی ہواوں اور زمین کے مقناطیسی کرہ کے درمیان تعامل کا مشاہدہ کرتے ہوئے سورج اور زمین کے رابطے کو مزید بہتر طور پر سمجھنا ہے۔
سی اے ایس کے نیشنل اسپیس سائنس سنٹر کے مطابق، سمائل سیٹلائٹ نے چین میں ترقیاتی کام مکمل کر لیے ہیں، جس میں سیٹلائٹ ٹیسٹنگ، سسٹم انٹرفیس ٹیسٹنگ اور ماحولیاتی تجربات شامل ہیں۔
سیٹلائٹ پلیٹ فارم اور پے لوڈ ماڈیول اکتوبر میں ہالینڈ میں یورپی خلائی تحقیق اور ٹیکنالوجی سنٹر پہنچنے کی توقع ہے، جہاں ان کو آپس میں جوڑا اور ان کی جانچ کی جائے گی۔پے لوڈ ماڈیول ای ایس اے نے تیار کیا ہے۔
سمائل سیٹلائٹ کو 2025 کے آخر تک فرانسیسی گیانا میں یورپ کی خلائی لانچنگ سائٹ سے خلا میں بھیجنے کا منصوبہ ہے۔یہ منصوبہ خلائی سائنس کے شعبے میں مشن کی سطح پر ای ایس اے کے ساتھ چین کا پہلا جامع تعاون ہے۔
