اسلام آباد: وفاقی وزیر داخلہ محسن نقوی نے کہا ہے کہ برطانیہ ترقی کے سفر میں پاکستان کا اہم شراکت دار ہے، باہمی مفاد کے تمام شعبوں میں دوطرفہ تعاون کو فروغ دینا چاہتے ہیں۔
جاری بیان کے مطابق وزیر داخلہ سے برطانوی ہائی کمشنر جین میریٹ نے ملاقات کی جس میں پاک برطانیہ تعلقات اور مختلف شعبوں میں دوطرفہ تعاون بڑھانے ،انسداد دہشت گردی، انسداد منشیات، بارڈر سکیورٹی اور انسانی سمگلنگ کے حوالے سے اشتراک کار بڑھانے پر تبادلہ خیال کیا گیا۔
برطانوی ہائی کمشنر نے نشان امتیاز ملنے پر وزیر داخلہ محسن نقوی کو مبارکباد دی اور نیک تمنائوں کا اظہار کرتے ہوئے سیلاب اور بارشوں سے قیمتی انسانی جانوں کے ضیاع پر افسوس جبکہ جاں بحق افراد کے خاندانوں سے دلی ہمدردی اور تعزیت کا اظہار کیا۔
وزیر داخلہ نے کہا کہ پاکستان ہمیشہ سے امن کا داعی رہا ہے، ہم دہشت گردی کی ہر شکل کی پر زور مذمت کرتے ہیں۔ انہوں نے کہا کہ برطانیہ ترقی کے سفر میں پاکستان کا اہم شراکت دار ہے، باہمی مفاد کے تمام شعبوں میں برطانیہ کے ساتھ دوطرفہ تعاون کو فروغ دینا چاہتے ہیں۔
