پاکستان کیخلاف تین ٹی 20 میچوں کی سیریز میں شرکت کیلئے سترہ رکنی آسٹریلوی سکواڈ لاہور پہنچ گیا ہے، کپتان مچل مارش اور جوش انگلس بگ بیش لیگ کا فائنل کھیلنے کے سبب پہلے میچ میں ریسٹ کرینگے، پہلے میچ میں ٹریوس ہیڈ کو کپتانی سونپی جاسکتی ہے۔
مچل مارش کی زیر قیادت آسٹریلوی کرکٹ ٹیم جمعرات کو پاکستان کیخلاف پہلا ٹی 20 کھیلے گی، دوسری جانب میزبان سائیڈ کی تیاریاں تیسرے روز بھی قذافی سٹیڈیم میں جاری رہیں، پاکستان سے تین ٹی 20میچز کی سیریز کیلئے آسٹریلوی سکواڈ میں پیٹ کمنز، جوش ہیزل ووڈ، میکسویل سمیت 5 سٹارز شامل نہیں، یہ تمام ورلڈ کپ کیلئے بھی منتخب ہوئے ہیں۔
مہمان پلیئرز کسی پریکٹس سیشن کے بغیر آج پہلا ٹی ٹوئنٹی میچ کھیلے گی۔
تینوں میچز قذافی سٹیڈیم میں کھیلے جائیں گے جہاں شائقین کی بڑی تعداد کی آمد متوقع ہے تمام میچز کے کامیاب انعقاد کیلئے انتظامیہ کی جانب سے سکیورٹی و دیگر انتظامات کو حتمی شکل دیدی گئی ہے۔
ادھر پاکستان ٹیم نے قذافی سٹیڈیم میں جاری کیمپ کے تیسرے روز بھی بھرپور ٹریننگ کی، کھلاڑیوں نے وارم اپ سیشن کے بعد نیٹ پریکٹس اور فیلڈنگ ڈرلز میں حصہ لیا، کوچنگ سٹاف کی جانب سے بیٹنگ، بولنگ اور فیلڈنگ کے مختلف پہلوئوں پر خصوصی توجہ دی گئی تاکہ ٹیم ہر ممکن صورتحال کیلئے تیار رہے۔
پاکستانی کھلاڑیوں میں سیریز کے حوالے سے خاصا اعتماد دیکھا جا رہا ہے، ٹیم مینجمنٹ کا کہنا ہے کہ آسٹریلیا جیسی مضبوط ٹیم کیخلاف سیریز موجودہ کمبی نیشن کو آزمانے کا بہترین موقع فراہم کریگی، پاک آسٹریلیا سیریز کو دونوں ٹیموں کیلئے ورلڈ کپ کی تیاری کا اہم مرحلہ قرار دیا جا رہا ہے، اگرچہ آسٹریلوی ٹیم اپنے کئی اہم کھلاڑیوں کیساتھ نہیں آرہی تاہم انکے پاس اب بھی تجربہ کار اور باصلاحیت کرکٹرز موجود ہیں جو کسی بھی وقت میچ کا رخ موڑنے کی صلاحیت رکھتے ہیں۔
دوسری جانب پاکستان ٹیم ہوم کنڈیشنز کا فائدہ اٹھاتے ہوئے سیریز میں برتری حاصل کرنے کیلئے پرعزم ہے۔
