اسلام آباد: وزیراعظم شہباز شریف نے جاپانی سرمایہ کاروں کو سرمایہ کاری کی دعوت دیتے ہوئے کہاہے کہ پاکستان سرمایہ کاروں کیلئے محفوظ و پرکشش ملک بن چکا ہے، عالمی مالیاتی ادارے اور عالمی سرمایہ کار پاکستان کے بڑے معاشی و ترقیاتی منصوبوں میں بھرپور دلچسپی کا اظہار کر رہے ہیں۔
جاری بیان کے مطابق وزیراعظم سے جاپان کے عالمی تعاون بینک کے شعبہ مائننگ اور میٹل فنانس کے ڈائریکٹر جنرل تارو کاٹو نے ملاقات کی جس میں دوطرفہ تعلقات اور سرمایہ کاری کے مواقع پر تبادلہ خیال کیا گیا۔
وزیراعظم نے کہا کہ پاکستان جاپان کیساتھ سفارتی و معاشی تعاون کو قدر کی نگاہ سے دیکھتا ہے، دونوں ممالک کے درمیان صنعت و تجارت میں ماضی کا اشتراک انتہائی مثبت رہا ہے، دونوں ممالک معاشی تعاون کی تجدید نو کیلئے پرعزم ہیں۔
انہوں نے کہا کہ حکومت ملک کو سرمایہ کاروں کیلئے محفوظ اور پرکشش بنانے کیلئے پرعزم ہے، جاپانی سرمایہ کاروں اور بینکوں کو ملک میں سرمایہ کاری کیلئے ہر ممکن سہولیات فراہم کریں گے۔ وزیراعظم نے کہا کہ زراعت، آئی ٹی، ٹیکسٹائل اور دیگر شعبوں میں جاپانی ٹیکنالوجی اور پیشہ ورانہ مہارت سے پاکستان خاطر خواہ فائدہ حاصل کر سکتا ہے۔
انہوں نے بتایا کہ عالمی مالیاتی ادارے اور بین الاقوامی سرمایہ کار پہلے ہی پاکستان کے بڑے معاشی اور ترقیاتی منصوبوں میں بھرپور دلچسپی کا اظہار کر رہے ہیں۔ انہوں نے کہا کہ پاکستان کی کم لاگت والی افرادی قوت سرمایہ کاروں کو مسابقتی ماحول فراہم کرتی ہے۔
اس موقع پر جاپان کے بین الاقوامی تعاون بینک کے ڈائریکٹر جنرل تارو کاٹو نے حکومت پاکستان اور عوام کی مہمان نوازی پر شکریہ ادا کرتے ہوئے کہا کہ جاپان پاکستان کیساتھ تعاون کو مزید وسعت دینے کا خواہاں ہے، جاپانی سرمایہ کاروں اور بینکوں کی پاکستان میں معاشی منصوبوں میں دلچسپی بڑھ رہی ہے ۔
