اسلام آباد: اسلام آباد ہائیکورٹ نے ارشد شریف شہید قتل کی تحقیقات کیلئے جوڈیشل کمیشن کے قیام کی درخواست پر فیصلہ محفوظ کرلیا۔تفصیلات کے مطابق اسلام آباد ہائیکورٹ میں چیف جسٹس عامر فاروق نے ارشد شریف شہید کے قتل کی تحقیقات کیلئے جوڈیشل کمیشن کے قیام کی درخواست پر سماعت کی۔
اٹارنی جنرل عدالت میں پیش ہوئے اور بتایا کہ کینیا حکومت کیساتھ معاہدہ ہونا ہے، کینیا حکومت کی نے کسی حد تک رسائی دی تھی جس کے بعد فیکٹ فائنڈنگ رپورٹ تیار کی گئی،رپورٹ پبلک ہونے پر کینیا حکومت نے ناراضگی کا اظہار کر کے رسائی ختم کردی۔
اٹارنی جنرل نے بتایا کہ اس کے بعد کینیا میں عام انتخابات کے بعد رپورٹ مکمل کی گئی، معاہدے کا ڈرافٹ کابینہ نے منظور کر لیا ہے اب اسے کینیا بھیجا جائے گا، ارشد شریف شہید کے معاملے میں دو پاکستانیوں کو انوسٹیگیٹ کیا گیا ہے۔
چیف جسٹس نے کہا کہ یہ درخواست جوڈیشل کمیشن سے متعلق ہے، معاہدہ ہوایا نہیں جو بھی ہے اس پر پاکستان کا کیا موقف ہے۔اٹارنی جنرل نے بتایا کہ سپریم کورٹ کا 5 رکنی بینچ تشکیل دیا جا چکا کیس گرمیوں کی چھٹیوں کے بعد سنا جائے گا۔
چیف جسٹس نے کہا کہ اگر پاکستان میں جوڈیشل کمیشن بنتا ہے تو کیا کینیا میں انوسٹیگیشن کر سکتے ہیں، کینیا کی اتھارٹیز تو کمیشن کے سامنے پیش ہونے کے پابند نہیں۔ اٹارنی جنرل نے جواب دیا کہ ایسا نہیں ہوگا کینیا کے ساتھ معاہدے کے بعد بھی مشکلات ہوں گی۔بعدازاں عدالت نے جوڈیشل کمیشن کے قیام کی درخواست پر فیصلہ محفوظ کرلیا۔
