اسلام آباد: اسلام آباد ہائیکورٹ میں سپورٹس جرنلسٹس نے میچز کی کوریج سے روکنے پرپی سی بی کیخلاف درخواست دائر کردی۔ تفصیلات کے مطابق اسلام آباد ہائیکورٹ میں سپورٹس جرنلسٹس ایاز اکبر، محسن علی، حسنین لیاقت، نوید گلزار اور اعمر نجیب نے پی سی بی کی جانب سے صحافیوں کو میچز کی کوریج سے روکنے کیخلاف درخواست د ائر کردی۔
ایڈووکیٹ عبوالواحد قریشی کے توسط سے دائر درخواست میں وفاق، پیٹرن انچیف وزیر اعظم، سیکریٹری کابینہ اور چیئرمین پی سی بی محسن نقوی کو فریق بناتے ہوئے موقف اپنایا گیا ہے کہ صحافی بطور رپورٹرز اور اینکرز صحافتی خدمات انجام دے رہے ہیں،ان کو پاکستان بمقابلہ بنگلہ دیش پہلے ٹیسٹ میچ کی کوریج سے روکا گیا ہے، آرٹیکل 19 اور 19 اے آزادی اظہار رائے کا حق دیتا ہے، کرکٹ بورڈ صحافیوں کو صحافتی ذمہ داری ادا کرنے سے نہیں روک سکتا۔
درخواست میں کہا گیا ہے کہ ہم متعدد قومی، بین الاقوامی مقابلوں کی کوریج کرچکے ہیں، ہم نے کئی ورلڈکپ، ورلڈ ٹی ٹونٹی اور چیمپیئنز ٹرافیز کی کوریج کی ہے، تاہم پی سی بی نے ہمیں کوریج کے آئینی حق سے محروم کردیا ہے۔
درخواست میں کہا گیا ہے کہ پی سی بی کو ٹیم کی کارکردگی کے بعد ہونے والی تنقید گراں گزری ہے،صحافیوں کو کوریج سے روکنا آئین کی خلاف ورزی اور آزادی صحافت کیخلاف ہے۔
درخواست میں کہا گیا ہے کہ صرف تنقید کی بنیاد پر صحافیوں پر کرکٹ کوریج پر پابندی نہیں لگائی جا سکتی، استدعا ہے کہ صحافیوں کو ایکریڈیشن کارڈ جاری نہ کرنے کا عمل غیر قانونی قرار دے کر ایکریڈیشن کارڈز جاری کئے جائیں۔
