کوئٹہ: وفاقی وزیر داخلہ محسن نقوی نے کہا ہے کہ دہشت گرد ایک ایس ایچ او کی مار ہیں، بلوچستان میں کسی بڑے آپریشن کی ضرورت نہیں، چھپ کر حملہ کرنیوالوں میں ہمت ہوتی تو سامنے آکر مقابلہ کرتے،جلد انہیں اچھا پیغام مل جائے گا،فورسز مقابلہ کرنا اچھے سے جانتی ہیں۔
تفصیلات کے مطابق کوئٹہ میں وزیراعلی بلوچستان میر سرفراز بگٹی کے ہمراہ پریس کانفرنس کرتے ہوئے وفاقی وزیر داخلہ محسن نقوی نے کہا کہ میرے یہاں آنے کا مقصد عوام کو بتایا ہے کہ ہم بلوچ عوام اور وزیراعلی بلوچستان کے ہمراہ کھڑے ہیں، یہ جو فیصلہ کریں گے ہم ان کے ساتھ ہیں مل کر دہشت گردوں کا مقابلہ کریں گے۔
انہوں نے بتایا کہ بلوچستان کے معاملے پر بہت کام ہورہا ہے کچھ سامنے ہے اور کچھ بظاہر نظر نہیں آرہا۔انہوں نے کہا کہ جو کچھ بلوچستان میں ہوا ہمیں اس پر دکھ ہے، قتل وغارت کے یہ واقعات قابل برداشت نہیں،ہمیں ان سے ڈرایا نہیں جاسکتا، دہشت گردوں کو جلد ایک اچھا پیغام مل جائے گا۔
انہوں نے کہا کہ بلوچستان حکومت بالکل جاگی ہوئی ہے، دہشت گردوں کیخلاف مقابلے کی جو سوچ اس حکومت میں آئی ہے پہلے کبھی نہیں آئی،ان دہشت گردوں نے چھپ کر حملہ کیا، ہمت ہوتی تو سامنے آکر مقابلہ کرتے۔
انہوں نے کہا کہ دہشت گردوں کے خلاف کسی بڑے آپریشن کی ضرورت نہیں یہ صرف ایک ایس ایچ او کی مار ہیں،دہشت گردوں کا مقابلہ کرنا ہماری فورسز اچھی طرح جانتی ہیں، جلد ان کا بندوبست ہوگا۔
ایک سوال پر انہوں نے کہا کہ ایس ایچ او کہنے کا مقصد یہ نہیں کہ صرف ایک ایس ایچ او ہی آپریشن کرے گا مطلب یہ کہ چھوٹی کارروائی ہوگی، بلوچستان سب سے بڑا صوبہ ہے یہاں چپے چپے پر فورسز نہیں لگاسکتے۔
