اسلام آباد(انٹرنیوز) جماعت اسلامی نے 14اپریل کو اسلام آباد میں بلوچستان پر قومی مجلس مشاورت ،20اپریل کو پشاور میں بڑے امن مارچ کا اعلان کرتے ہوئے کہا ہے کہ فارم 47والوں کی حکومت رہنے تک مہنگائی ،دہشت گردی میں کمی نہیں آئے گی۔اسلام آباد میں جماعت اسلامی خیبر پختونخوا کے رہنمائوں پروفیسر محمد ابراہیم، عنایت اللہ خان اور میاں اسلم کے ہمراہ پریس کانفرنس کرتے ہوئے امیر جماعت اسلامی حافظ نعیم الرحمن نے کہا کہ خیبر پختونخوا کے جنوبی اضلاع اور سابق فاٹا میں بدامنی انتہاء کو چھو چکی ہے، مسلسل سیکیورٹی فورسز کو نشانہ بنایا جا رہا ہے،
بلوچستان میں بھی حالات خراب ہیں ،وہاں کی قیادت کو اعتماد میں نہیں لیا جا رہا۔انہوں نے کہا کہ ان حالات میں سب کو ساتھ لے کر چلنے کی بجائے آرمی چیف جنرل سید عاصم منیر نے بیڈ گورننس کا ملبہ حکومت پر ڈال دیا۔ وہ یہ تو بتائیں کہ اس بیڈ گورننس والی حکومت کو لایا کون ہے؟ ،جب آپ فارم 45کی بجائے فارم 47والوں کو اقتدار میں لائیں گے تو عوامی نمائندے نہیں ہوں گے پھر مہنگائی و بدامنی کے مسائل کیسے حل ہوں گے؟۔ انہوں نے کہا کہ بلاول بھٹو کہہ رہے ہیں ایک اور پارلیمانی قومی سلامتی کمیٹی اجلاس بلایا جائے جس میں اپوزیشن کی تمام جماعتوں کو بلایا جائے۔ تو بتائیں پہلے انہیں کیوں قائل نہیں کیا گیا تھا؟ ۔
انہوں نے کہا کہ تاحال بجلی سستی کرنے کے بجائے صرف اعلانات کئے جا رہے ہیں، آئی پی پیز سے بات نہ کرنیوالی حکومت ہمارے دھرنے کے نتیجے میں ان سے بات چیت پر مجبور ہوئی ہے، اب بجلی قیمتیں کم کرنے پر بھی مجبور کریں گے، ورنہ عید کے بعد مہنگائی کے خلاف عوام کو متحرک کریں گے۔انہوں نے کہا کہ 14اپریل کو اسلام آباد میں بلوچستان پر قومی مجلس مشاورت جبکہ 20اپریل کو پشاور میں بڑا امن مارچ کیا جائے گا۔
