امریکا میں شدید برفانی طوفان نے نظام زندگی منجمد کردیا ہے، برفباری کے باعث مختلف حادثات میں 30 افراد ہلاک ہوگئے ہیں۔
غیر ملکی ذرائع ابلاغ کے مطابق واشنگٹن، نیویارک، ٹیکساس، اوکلاہوما، نیوجرسی سمیت درجنوں ریاستوں میں سرد ہواؤں کیساتھ شدید برفباری اور بارش جاری ہے، برفانی طوفان کے باعث امریکا بھر میں 19 ہزار پروازیں منسوخ ہوگئی ہیں، واشنگٹن میں وفاقی دفاتر بند ہیں، آرکنساس سے نیو انگلینڈ تک ایک فٹ سے زائد برف پڑ چکی ہے، شدید خراب موسم کے باعث سڑکیں اور تعلیمی ادارے بند کر دئیے گئے ہیں۔
پٹسبرگ کے شمالی علاقوں میں 20 انچ تک برفباری ریکارڈ کی گئی، درجہ حرارت بھی منفی 31 ڈگری سینٹی گریڈ تک گر گیا ہے، کچھ علاقوں میں دہائیوں کی شدید ترین سردی محسوس کی گئی۔
نیویارک سٹی میں 8 افراد کی لاشیں کھلے مقامات سے ملی ہیں، بارش اور برفانی طوفان کے باعث 10لاکھ سے زائد افراد بجلی سے محروم ہیں، 44 ریاستوں کے تقریباً 20 کروڑ افراد کیلئے شدید ترین ٹھنڈ کی وارننگ جاری کی گئی ہے، 24ریاستوں میں ایمرجنسی نافذ کر دی گئی ہے۔
محکمہ موسمیات نے خبردار کیا ہے کہ آئندہ دنوں میں مزید شدید سردی اور ممکنہ طور پر ایک اور برفانی طوفان مشرقی ساحلی علاقوں کو متاثر کر سکتا ہے۔
