لاہور: وزیراعلی پنجاب مریم نوازنے کہا ہے کہ پولیس میں رشوت کے خاتمے کیلئے یونیفارم کیساتھ کیمرے لگا رہے ہیں،کالجز یونیورسٹیز میں منشیات کی روک تھام کیلئے بڑے گینگ پکڑے ہیں، وائس چانسلرز میرٹ، شفافیت پر لگائے، گورنر پنجاب یونیورسٹی میں اپنا وائس چانسلر لانا چاہتے ہیں۔
تفصیلات کے مطابق لاہور میں صحافیوں سے گفتگوکرتے ہوئے وزیراعلی پنجاب مریم نواز نے کہا کہ وائس چانسلرز کی تعیناتی پر گورنر کو جس پر اعتراض تھا مسترد کر سکتے تھے مگر وہ اپنا وائس چانسلر لگوانا چاہتے ہیں۔انہوں نے کہا کہ وائس چانسلر کی تعیناتی پر سارا معاملہ پنجاب یونیورسٹی کا ہے، میرٹ اور شفافیت پر وائس چانسلرز لگائے ہیں، ہر کام میرٹ پر کر رہی ہوں، سفارش بہت آتی ہیں، ایم این اے اور ایم پی اے سب سفارش لاتے ہیں، میں کسی کی بھی نہیں سنتی، صبح 9 بجے سے رات 12 بجے تک میں کام کرتی ہوں۔
انہوں نے کہا کہ محکمہ پولیس میں رشوت کے خاتمے کیلئے یونیفارم کیساتھ کیمرے لگا رہے ہیں، کوئی بھی پولیس اہلکار اس یونیفارم کے بغیر ڈیوٹی نہیں کرے گا۔ انہوں نے بتایا کہ کالجز یونیورسٹیز میں منشیات کی روک تھام کیلئے بڑے بڑے گینگ پکڑے ہیں،یہ ذاتی جہازوں پر مختلف شکلوں میں منشیات لا کر بیچتے تھے۔
انہوں نے کہا کہ کلینکس آن ویلز سے دیہی جگہوں پر سینکڑوں افراد مستفید ہو رہے ہیں، کسان کارڈ اور ٹریکٹر سکیم کے لانچ ہوتے ہی لاکھوں لوگوں نے فوری اپلائی کیا۔
