اسلام آباد: طلباء میں تقسیم کیلئے رکھے گئے لیپ ٹاپس کی بڑی تعداد پڑے پڑے خراب ہوگئی۔ تفصیلات کے مطابق قائمہ کمیٹی برائے خزانہ کی جانب سے جاری کی گئی دستاویزات میں بتایا گیا ہے کہ طلباء میں تقسیم نہ ہونیوالے لیپ ٹاپس کی بڑی تعداد پڑے پڑے ناکارہ ہو گئی ہے۔
دستاویزات کے مطابق لیپ ٹاپ سکیم کے سٹاک میں موجود لاکھوں روپے مالیت کے 44 لیپ ٹاپ مکمل ناکارہ ہو چکے ہیں جبکہ کروڑوں روپے مالیت کے خراب ہونیوالے262 لیپ ٹاپ کی مرمت درکار ہے۔دستاویزات کے مطابق 2011ء سے 2017ء تک لیپ ٹاپ سکیم کے 4 فیز شروع کئے گئے تھے، چاروں فیزز کیلئے 4 لاکھ 26 ہزار 275 لیپ ٹاپ خریدے گئے تھے۔
دستاویزات کے مطابق 2018ء میں پی ٹی آئی دور حکومت میں طلباء کو لیپ ٹاپ کی تقسیم پر پابندی لگائی گئی تھی، بچ جانیوالے لیپ ٹاپس مختلف اوقات میں ضرورت کے مطابق مختلف محکموں میں تقسیم کئے گئے۔پہلے 3 فیزز میں بچنے والے 3600 لیپ ٹاپ ای روزگار سینٹرز،100 لیپ ٹاپس ایمرسن کالج ملتان،8 ہزار لیپ ٹاپ دیہی مراکز مال ریونیو ڈیپارٹمنٹ،30 لیپ ٹاپ ڈی پی آئی کالجز اور ہائر ایجوکیشن ڈیپارٹمنٹ،2263 لیپ ٹاپ پبلک سیکٹر کالجز میں کمپیوٹر لیب اپ گریڈیشن،400 لیپ ٹاپس کشمیری طلباء کو دیئے گئے۔فیز فور کے 300 لیپ ٹاپ گلگت بلتستان حکومت اور250 لیپ ٹاپ نیشنل سکول آف پبلک پالیسی لاہور کو دیئے گئے۔
