پشاور: خیبرپختونخوا میں جاری بارشوں اور سیلاب کے باعث 406 افراد جاں بحق،245 زخمی ہوگئے جبکہ پی ڈی ایم اے نے متاثرہ اضلاع کی انتظامیہ کو امدادی سرگرمیاں تیز، متاثرین کو فوری مدد فراہمی کی ہدایت کی ہے۔
پی ڈی ایم اے کی جانب سے خیبرپختونخوا میں بارشوں اور فلش فلڈ کے باعث 15اگست سے اب تک ہونیوالے جانی و مالی نقصانات کی رپورٹ کے مطابق مختلف اضلاع میں حادثات کے نتیجے میں 406افراد جاں بحق اور 245زخمی ہوئے۔
رپورٹ کے مطابق جاں بحق ہونے والوں میں 305مرد، 55خواتین اور 46بچے شامل ہیں جبکہ زخمیوں میں 179مرد، 38خواتین اور 30بچے شامل ہیں۔رپورٹ کے مطابق بارشوں اور فلش فلڈ کے نتیجے میں مجموعی طور پر 3526مکانات کو نقصان پہنچا، جن میں 2945گھروں کو جزوی اور 577 گھروں کو مکمل طور پر منہدم قرار دیا گیا ہے۔
رپورٹ کے مطابق بونیر میں اب تک جاں بحق افراد کی تعداد 337ہو گئی، جب کہ صوابی میں 46افراد زندگی کی بازی ہار گئے، دیگر حادثات سوات، باجوڑ، مانسہرہ، شانگلہ، دیر لویر، بٹگرام اور ڈیرہ اسماعیل خان میں بھی پیش آئے۔ پی ڈی ایم اے نے متاثرہ اضلاع کی انتظامیہ کو امدادی سرگرمیاں مزید تیز کرنے اور متاثرین کو فوری مدد فراہم کرنے کی ہدایت کی ہے۔
حکام کے مطابق ایمرجنسی آپریشن سنٹر مکمل طور پر فعال ہے ،عوام کو ہدایت کی گئی ہے کہ کسی بھی ناخوشگوار واقعے، موسمی صورتحال یا معلومات کے لیے فری ہیلپ لائن 1700 پر فوری رابطہ کریں۔ ترجمان کے مطابق پی ڈی ایم اے اور تمام متعلقہ ادارے آپس میں مسلسل رابطے میں ہیں اور صورتحال پر نظر رکھے ہوئے ہیں۔
