لاہور: بھارت نے آبی جارحیت کرتے ہوئے پھر دریائے ستلج میں پانی چھوڑ دیا جس سے سیلاب کی صورتحال شدت اختیار کرنے لگ گئی ۔ محکمہ آبپاشی کے مطابق ہیڈ گنڈا سنگھ پر پانی کی سطح 21.80فٹ ہوگئی ہے جبکہ پانی کا اخراج 1لاکھ 74ہزار 62کیوسک اور انتہائی اونچے درجے کا سیلاب ہے۔
محکمہ آبپاشی کے مطابق ہیڈ سلیمانکی پر درمیانے درجے کا سیلاب ہے، یہاں پانی کی آمد ایک لاکھ 4 ہزار 664کیوسک ریکارڈ کی گئی ہے۔فلڈ فورکاسٹنگ سینٹر کے مطابق ہیڈ اسلام پر بھی نچلے درجے کا سیلاب ہے اور پانی کی آمد 46ہزار 135کیوسک ہے۔
ادھر خیرپور ٹامیوالی، صدر بہاولپور اور احمد پور شرقیہ کے بیڈ کے علاقوں میں سیلاب تیزی پھیلنے لگا ہے جس سے ہزاروں ایکڑ پر کپاس اور دیگر فصلیں، مکانات اور سرکاری سکول زیر آب آچکے ہیں۔
محکمہ آبپاشی کے مطابق مقامی انتظامیہ نے بھی سیلابی صورتحال کے پیش نظر الرٹ جاری کردیا ہے،ریسکیو حکام کے مطابق سیلاب سے متاثرہ علاقوں سے اب تک 361افراد کو نکالا جاچکا ہے۔
