اسلام آباد: پی ٹی آئی نے مخصوص نشستوں کے فیصلے پر عملدرآمد کیلئے سپریم کورٹ میں متفرق درخواست دائر کردی۔ تفصیلات کے مطابق پی ٹی آئی نے عزیز بھنڈاری ایڈووکیٹ کے توسط سے مخصوص نشستوں بارے فیصلے پر عملدرآمد کیلئے سپریم کورٹ میں متفرق درخواست دائر کردی ہے۔
متفرق درخواست میں استدعاء کی گئی ہے کہ الیکشن کمیشن کی وضاحت کی درخواست مسترد اور آزاد ارکان کے وابستگی کے سرٹیفکیٹ منظور کرنے کا حکم دیا جائے۔درخواست میں کہا گیا ہے کہ الیکشن کمیشن نے فیصلے پر وضاحت کیلئے عدالت سے رجوع کیا ہے،الیکشن کمیشن کا کہنا کہ اسے فیصلے پر عملدرآمد میں مشکلات کا سامنا ہے درست نہیں۔الیکشن کمیشن نے متفرق درخواست نیک نیتی سے دائر نہیں کی، اقدام عدالتی فیصلے پر عملدرآمد میں تاخیر کی کوشش ہے۔
درخواست میں کہا گیا کہ الیکشن کمیشن مخصوص نشستوں میں رکاوٹ پیدا کر رہا ہے،پی ٹی آئی کا آئین قانون قانون کے مطابق بنیادی ڈھانچہ موجود ہے، پی ٹی آئی نے 3 مارچ کو انٹرا پارٹی الیکشن کرایا اور اس کی تفصیلات الیکشن کمیشن میں جمع کرائیں، بیرسٹر گوہر اور عمر ایوب باالترتیب چیئرمین اور جنرل سیکرٹری منتخب ہوئے۔
درخواست میں کہا گیا کہ ارکان کی پارٹی وابستگی کو چیئرمین اور سیکرٹری نے دستخط سے منظوری دی گئی، الیکشن کمیشن پابند ہے کہ پارٹی وابستگی کے سرٹیفکیٹس پر کارروائی مکمل کرے۔عدالت سے استدعاء ہے کہ الیکشن کمیشن کو 12 جولائی کے مختصر فیصلے پر عمل کا حکم دیا جائے۔
