لاہور: وزیر اعلیٰ پنجاب مریم نوازنے داتا دربارعرس انتظامات پر اظہار اطمینان کرتے ہوئے کہا کہ حضرت علی بن ہجویریؒ نے محبت، احترام، امن اور رواداری کا پیغام عام کیا، زائرین ہمارے مہمان ہیں،احترام کے ساتھ لنگر پیش،ٹریفک روانی یقینی بنائی جائے۔
تفصیلات کے مطابق وزیراعلی پنجاب مریم نواز نے حضرت داتا گنج بخش علی بن عثمان الہجویری ؒکی دینی و روحانی خدمات پر ان سے عقیدت کا اظہارکرتے ہوئے عرس کے انتظامات پر اطمینان کا اظہار کیا ہے۔ انہوں نے کہاکہ حضرت داتا گنج بخشؒ نے محبت، احترام، امن اور رواداری کا پیغام عام کیا۔
اْنہوں نے عرس میں آنیوالے عقیدت مندوں کی بہترین میزبانی یقینی بنانے کی ہدایت کرتے ہوئے کہا کہ زائرین ہمارے مہمان ہیں، ان سے محبت سے پیش آیا جائے۔ انہوں نے ہدایت کی کہ زائرین کو احترام کے ساتھ لنگر پیش،سبیلوں پر رش سے بچنے کیلئے بہترین نظم و ضبط کا اہتمام کیا جائے۔ انہوں نے ہدایت کی کہ وارڈن اورافسران عرس کے دوران ٹریفک روانی یقینی بنائیں۔
