اسلام آباد: وفاقی وزیر داخلہ محسن نقوی نے کہا ہے کہ دشمن منصوبے کے تحت ملک میں انارکی کا خواہاں ہے، تحقیقات کے بعد ثبوت سامنے لائینگے، بلوچستان میں تخریب کاری واقعات عدم استحکام پیدا کرنے کی سازش ہیں، اگر کوئی یہ سمجھتا ہے بزدلانہ کارروائیوں سے قوم کے عزم کو شکست دے سکتا ہے تو یہ اس کی بھول ہے،دہشت گردوں اور سہولت کاروں کو چھپنے کی جگہ نہیں ملے گی۔
تفصیلات کے مطابق بلوچستان میں دہشت گردی کے واقعات پر ایک بیان میں وفاقی وزیر داخلہ محسن نقوی نے کہاکہ بلوچستان کے مختلف علاقوں میں یکے بعد دیگرے دہشت گردی کے واقعات میں شہداء کے لواحقین کے غم میں برابر کے شریک ہیں۔
انہوں نے کہا کہ تخریب کاری کییہ واقعات پاکستان میں عدم استحکام پیدا کرنے کی سازش ہیں،دشمن سوچے سمجھے منصوبے کے تحت ملک میں انارکی پیدا کرنا چاہتا ہے،تحقیقات کے بعد حقائق ثبوت کے ساتھ سامنے لائیں گے۔
انہوں نے کہا کہ سیکیورٹی فورسز اور قانون نافذ کرنے والے اداروں نے بروقت کارروائی کرکے 12 دہشتگردوں کو جہنم واصل کیا۔ انہوں نے کہا کہ بلوچستان میں قیام امن کیلئے ہر ممکن اقدام کیا جائے گا،صورتحال مستقل بنیادوں پر مانیٹر کی جارہی ہے۔
انہوں نے کہا کہ بلوچستان حکومت کے ساتھ رابطے میں ہوں، دہشت گردوں اور سہولت کاروں کو چھپنے کی جگہ نہیں ملے گی،امن کی فضاء برقرار رکھنے کیلئے موثر اقدامات اٹھائے جا رہے ہیں۔
انہوں نے کہا کہ اگر کوئی یہ سمجھتا ہے کہ بزدلانہ کارروائیوں سے قوم کے غیرمتزل عزم کو شکست دے سکتا ہے تو یہ اس کی بھول ہے۔ انہوں نے کہا کہ دہشتگردی کے خلاف جنگ مکمل خاتمے تک جاری رہے گی۔
