کوئٹہ: وفاقی وزیرداخلہ محسن نقوی نے کہا ہے کہ فتنہ الہندوستان کے دہشت گردوں کا انجام عبرتناک موت ہے،بھارتی سپانسرڈ دہشتگردوں ،آلہ کاروں کو کہیں چھپنے کی جگہ نہیں ملے گی۔جاری بیان کے مطابق ہفتہ کو وفاقی وزیرداخلہ محسن نقوی دورہ بلوچستان کے دوران وزیراعلی ہاؤس پہنچے جہاں میر سرفراز بگٹی نے ان کا استقبال کیا۔
ملاقات کے دوران دونوں رہنماؤں نے امن عامہ ،فتنہ الہندوستان کے دہشتگردوں کی سرکوبی کے اقدامات پر تبادلہ خیال کیا جبکہ شہدا کی قربانیوں کو خراج عقیدت پیش کرتے ہوئے ایصال ثواب کیلئے دعاء کی گئی۔بعد ازاں دونوں رہنماؤں کی زیر صدارت امن وامان سے متعلق خصوصی اجلاس کا انعقاد ہوا جس میں فتنہ الہندوستان کے خلاف مختلف علاقوں میں سیکیورٹی فورسز کی کارروائیوں پر تفصیلی غور کیا گیا۔
اجلاس میں انسپکٹر جنرل پولیس، آئی جی ایف سی نارتھ، ڈی آئی جی سی ٹی ڈی، ڈی آئی جی اسپیشل برانچ، ڈی جی لیویز کے علاوہ محکمہ داخلہ اور قانون نافذ کرنے والے اداروں کے اعلی حکام شریک ہوئے ۔وزیر اعلی سرفراز بگٹی نے امن و امان کی مجموعی صورتحال اور سیکیورٹی اقدامات پر بریفنگ دی جبکہ اجلاس میں صوبائی ایکشن پلان پر عمل درآمد اور اس میں درپیش رکاوٹوں کا بھی جائزہ لیا گیا۔
اس موقع پر گفتگو کرتے ہوئے وفاقی وزیر داخلہ محسن نقوی نے کہا کہ فتنہ الہندوستان کے دہشتگردوں کا انجام عبرتناک موت ہے، بھارتی سپانسرڈ دہشتگردوں اور ان کے سہولت کاروں کو انجام تک پہنچائیں گے انہیں چھپنے کی کہیں جگہ نہیں ملے گی۔
انہوں نے کہا کہ پاکستان دشمن عناصر کے لیے زمین تنگ کر دی گئی ہے ، ریاستی رٹ چیلنج کرنے والوں کے ساتھ آہنی ہاتھوں سے نمٹا جائے گا۔ انہوں نے کہا کہ دہشتگردی کے خلاف جنگ میں بلوچستان حکومت کی مکمل سپورٹ جاری رکھیں گے۔
اس موقع پر وزیر اعلی بلوچستان میر سرفراز بگٹی نے کہا کہ وفاق اور صوبائی حکومت متفق ہیں کہ یہ جنگ سکیورٹی فورسز کی نہیں بلکہ پوری قوم کی جنگ ہے، دہشتگردی میں ملوث عناصر کے خلاف کارروائیاں مزید تیز کر دی ہیں۔
انہوں نے کہا کہ بلوچستان میں قیام امن کیلئے ریاستی ادارے مکمل ہم آہنگی سے سرگرم عمل ہیں۔ انہوں نے کہا کہ ہر قیمت پر امن قائم کریں گے،سیکیورٹی فورسز اور عوام کی قربانیاں رائیگاں نہیں جائیں گی۔
