راولپنڈی: بانی پی ٹی آئی عمران خان نے کہا ہے کہ گینگ آف تھری کی توسیع کیلئے سارا ملک داؤ پر لگا ہوا ہے، ملک کا بیڑا غرق کر کے اب سپریم کورٹ کو تباہ کیا جارہا ہے، جسٹس منصور علی شاہ کی مکمل حمایت کرتے ہیں، اگلے چیف جسٹس کی تقرری کا اعلان کیا جائے، راولپنڈی جلسے کی اجازت نہ ملی تو احتجاج کریں گے، قاضی فائز عیسیٰ آئینی ترامیم کے بینیفشری جو انصاف نہیں ہونے دے رہے۔
تفصیلات کے مطابق اڈیالہ جیل میں صحافیوں سے غیر رسمی گفتگو کرتے ہوئے بانی پی ٹی آئی عمران خان نے کہا کہ سپریم کورٹ میں کل سے جو ہو رہا ہے سب کو پتا چل گیا ہے یہ کیا کر رہے ہیں، یہ سب گینگ آف تھری کو توسیع دینے کیلئے کیا جا رہا ہے، انہوں نے ملک کا بیڑا غرق کردیا اب سپریم کورٹ کو تباہ کر رہے ہیں، گینگ آف تھری کی توسیع کیلئے سارا ملک داؤ پر لگا ہوا ہے۔
انہوں نے کہا کہ یہاں سارے فیصلے لکھے ہوئے آتے ہیں جنہیں ججز آ کر سنا دیتے ہیں، یہ چاہتے ہیں کہ سپریم کورٹ اور ہائی کورٹ ججز بھی تابع ہو جائیں۔ انہوں نے کہا کہ ہائی کورٹ ججز پر دباؤ ڈالا جا رہا ہے،حکومت ساری عدلیہ تباہ کرنے پر لگی ہے، الیکشن فراڈ کو کور کرنے کیلئے ان کو اپنے ججز چاہئیں۔
انہوں نے کہا کہ8فروری کے انتخابات کو پوری دنیا نے فراڈ الیکشن کہا، ایک بار بھی قاضی فائز عیسیٰ نے یہ نہیں کہا کہ ہماری خواتین اور کارکنان جو جیلوں میں ہیں ان کیساتھ کیا ہو رہا ہے؟۔ایک سوال پر انہوں نے کہا کہ 9مئی واقعات میں آگ انہوں نے لگائی، آئی ایس پی آر جواب دے سی سی ٹی وی فوٹیجز کہاں گئیں؟، یہ چاہتے ہیں کہ پی ٹی آئی کسی بھی طرح اوپر نہ آئے۔
انہوں نے کہا کہ ہمیں کوئی جلسہ نہیں کرنے دیا جا رہا، چیف جسٹس کام بنیادی حقوق کا تحفظ ہے، گرمیوں کا جلسہ بھی کیا کبھی 6 بجے ختم ہوتا ہے؟، ساری قوم کو پتا ہے کیا ہو رہا ہے، کل سے جو ہو رہا ہے اس سے واضح ہے کہ چیف جسٹس اور چیف الیکشن کمشنر ملے ہوئے ہیں۔
انہوں نے کہا کہ سپریم کورٹ اور معیشت سمیت پورا نظام ڈول رہا ہے، چیف الیکشن کمشنر کو پتا ہے کہ اس پر آرٹیکل 6 لگے گا، اسی لئے الیکشن فراڈ کو دبایا جارہا ہے، چیف جسٹس بھی الیکشن فراڈ کا معاملہ چیف الیکشن کمشنر کے پاس بھجوا دیتا ہے، سب سے زیادہ دھاندلی زدہ الیکشن کی تعریف چیف جسٹس کرتا ہے۔
انہوں نے کہا کہ تھرڈ امپائر سب کنٹرول کر رہا ہے وہ ان کی ٹیم کا کپتان ہے، ان کا مقصد یہ ہے کہ فراڈ سامنے نہ آ جائے۔ انہوں نے کہا کہ پی ٹی آئی کے ڈر سے سپریم کورٹ،جمہوریت کو تباہ کیا جا رہا ہے، آج ججز کو دھمکیاں مل رہی ہیں، کیوں چیف جسٹس نہیں سنتے وہ اس لئے کہ وہ ان کا حصہ ہیں، اسلام آباد ہائی کورٹ کے ججز نے جو کہا اس پر چیف جسٹس نے کیا کیا؟۔انہوں نے کہا کہ راولپنڈی میں جلسے کی اجازت نہ دی گئی تو احتجاج کریں گے، اگلے چیف جسٹس کی تقرری کا اعلان کیا جائے، جسٹس منصور علی شاہ کی مکمل حمایت کرتے ہیں، اس وقت یحییٰ خان پارٹ ٹو حکومت ہے۔
انہوں نے کہا کہ مشرقی پاکستان کے لوگ پاکستان چھوڑنا نہیں چاہتے تھے وہ لوگ حقوق چاہتے تھے، طاقت کا استعمال کر کے انہیں علیحدگی کی جانب دھکیل دیا گیا، یحییٰ خان نے اپنی طاقت کیلئے جیتی ہوئی جماعت کو اقتدار نہیں دیا۔
انہوں نے کہاکہ آئینی عدالت کا مقصد سپریم کورٹ کے چیف جسٹس کی طاقت ختم کرنا ہے، یہ چیف جسٹس کی طاقت ختم کر کے قاضی فائزعیسیٰ کو آئینی عدالت میں بٹھانا چاہتے ہیں، چیف جسٹس آئینی ترامیم کے بینیفشری،انصاف نہیں ہونے دے رہے، انہوں نے ہمارا انتخابی نشان تک لے لیا تھا۔
