راولپنڈی: پاکستان ریلوے نے نظام کو جدید بنانے کیلئے ڈیجیٹل ٹرانسفارمیشن پروگرام شروع کردیا۔ ریلوے حکام کے مطابق پروگرام کا مقصد ٹرینوں کی حفاظت کو بہتر بنانا، تاخیر میں کمی لانا اور مسافروں و مال برداری کی خدمات کو زیادہ موثر بنانا ہے۔
ذرائع کے مطابق ڈیجیٹل پروگرام کے تحت اہم سیکشنز پر جدید کمیونیکیشن اور سگنلنگ سسٹم نصب کئے جا رہے ہیں ،لانڈھی، جمعہ گوٹھ، بادل نالہ اور سرحد اسٹیشنز پر کمپیوٹرائزڈ انٹر لاکنگ سسٹم کی تنصیب شامل ہے جو مینوئل کنٹرولز کی جگہ لے گا۔
جدید نظام سے ٹرینوں کی روانگی اور راستہ طے کرنے کے عمل میں بہتری ،حادثات کے خدشات میں کمی ہوگی۔حکام کے مطابق کراچی سے لاہور سیکشن پر ٹیلی کام سسٹم کو اپ گریڈ کرتے ہوئے ڈیجیٹل مائیکرو ویو ریڈیو کمیونیکیشن سسٹم متعارف کروایا جا رہا ہے تاکہ ٹرین آپریشن کیلئے ڈیٹا کی محفوظ اور بلا تعطل ترسیل یقینی بنائی جاسکے اسی طرح راولپنڈی، لاہور، سکھر اور کراچی ڈویژنز میں پش ٹو ٹاک ڈیجیٹل کمیونیکیشن نیٹ ورک بھی متعارف کروایا جارہا ہے جو فیلڈ سٹاف اور کنٹرول رومز کے درمیان ریئل ٹائم رابطے کو مزید مضبوط کرے گا۔
ریلوے حکام کے مطابق ڈیجیٹل پروگرام سے پاکستان ریلوے کے مجموعی ڈھانچے میں انقلابی تبدیلی آئے گی اور مسافروں سمیت فریٹ سروسز کو عالمی معیار کے مطابق ڈھالا جاسکے گا۔
