اسرائیلی حملوں کے نتیجے میں 59 ہزار سے زائد فلسطینی جاں بحق، وزارت صحت

غزہ میں 7 اکتوبر 2023 سے جاری اسرائیلی حملوں کے نتیجے میں ہلاکتوں کی تعداد 59 ہزار سے تجاوز کر گئی ہے۔

وزارت صحت کے مطابق اب تک 59 ہزار 29 فلسطینی جاں بحق اور ایک لاکھ 42 ہزار 135 زخمی ہو چکے ہیں۔

حکام کے مطابق 18 مارچ سے اب تک 8 ہزار 196 افراد جاں بحق اور 30 ہزار 94 زخمی ہوئے ہیں جو حالیہ ہفتوں میں شدت اختیار کرنے والی جارحیت کی عکاسی کرتا ہے۔

گزشتہ 24 گھنٹوں کے دوران 134 لاشیں اسپتالوں میں منتقل کی گئی ہیں جبکہ 1,155 افراد مختلف نوعیت کی چوٹوں کا شکار ہوئے ہیں۔

حکام نے خدشہ ظاہر کیا ہے کہ ملبے تلے دبے افراد کے باعث یہ تعداد مزید بڑھ سکتی ہے۔

مقامی اور بین الاقوامی انسانی حقوق کی تنظیموں نے موجودہ صورت حال کو "انسانی بحران کی تیزی سے بگڑتی ہوئی کیفیت” قرار دیتے ہوئے امدادی نظام کی ناکامی پر شدید تشویش کا اظہار  کیا ہے۔

غزہ میں کام کرنے والی امدادی تنظیموں نے مشترکہ بیان میں کہا ہے کہ "فوری طور پر محفوظ انسانی راہداریاں قائم کرنے اور ضروری امداد تک رسائی حاصل کرنے والے شہریوں کے تحفظ کی ضمانت دینا ناگزیر ہے۔”

طبی ذرائع کے مطابق اسپتال اور صحت کے مراکز شدید دباؤ میں کام کر رہے ہیں۔ ادویات، طبی سامان اور ایندھن کی شدید قلت، بجلی کی بندش اور وسائل کی کمی نے ہزاروں مریضوں، خاص طور پر نازک حالت میں زیر علاج افراد اور انکیوبیٹرز میں رکھے گئے نومولود بچوں کی زندگیاں خطرے میں ڈال دی ہیں۔

اقوام متحدہ اور علاقائی تنظیمیں متعدد بار فوری جنگ بندی اور عالمی نگرانی میں امدادی راہداریاں قائم کرنے کا مطالبہ کر چکی ہیں۔ تاہم ایک پائیدار انسانی حل کی کوششیں تاحال کسی نتیجے پر نہیں پہنچ سکیں۔

غزہ، فلسطین سے نمائندہ شِنہوا نیوز ایجنسی کی رپورٹ

—————————————–

آن سکرین ٹیکسٹ:

غزہ میں اسرائیلی حملے جاری، ہلاکتوں کی تعداد 59 ہزار سے تجاوز کر گئی

زخمیوں کی مجموعی تعداد ایک لاکھ 42 ہزار سے زائد۔طبی حکام

گزشتہ 24 گھنٹوں میں 134 لاشیں اسپتال لائی گئیں، 1155 افراد زخمی

صحت حکام کا ملبے تلے مزید افراد کی موجودگی کا خدشہ

18 مارچ سے اب تک 8196 فلسطینی جاں بحق، 30 ہزار سے زائد زخمی

غزہ میں انسانی بحران سنگین، عالمی ادارے تشویش میں مبتلا

ادویات، ایندھن اور بجلی کی قلت سے اسپتال شدید دباؤ کا شکار

نوزائیدہ بچوں اور آئی سی یو میں مریضوں کی زندگیوں کو خطرہ

اقوام متحدہ اور علاقائی تنظیموں کی فوری جنگ بندی کی اپیل