خیبرپختونخوا کے قبائی ضلع خیبر کے وادی تیراہ میں بارش اور مسلسل و شدید برفباری کے باعث نظام زندگی شدید متاثر ہوگیا ہے اور شدید برفباری کے باوجود پاک فوج کی فوری اور موثر ریلیف سرگرمیاں جاری ہیں، پاک فوج کا مقامی آبادی کی مدد اور روزمرہ زندگی کی بحالی کیلئے ریلیف آپریشن کئی روز سے بلا تعطل جاری ہے۔
ریلیف سرگرمیوں کے دوران برف میں پھنسنے والی متعدد گاڑیوں کو بھی بحفاظت نکال کر محفوظ مقامات تک منتقل کیا گیا ہے، خراب موسم اور مواصلاتی مشکلات کے باوجود پاک فوج اور ایف سی کے افسران و جوان ذاتی طور پر بھی امدادی سرگرمیوں کی نگرانی کر رہے ہیں، امدادی کارروائیوں کے دوران متاثرہ خاندانوں کو کھانا، کمبل اور ہنگامی طبی امداد سمیت ضروری اشیائے ضرورت بھی فراہم کی جا رہی ہیں۔
پاک فوج کی بروقت اور پیشہ ورانہ حکمت عملی کے باعث علاقے میں اہم زمینی رابطے بحال ہوئے، سخت موسمی حالات میں امدادی اقدامات پر مقامی شہریوں نے سیکورٹی فورسز کی کوششوں کو سراہا، پاک فوج مقامی آبادی کی فلاح و بہبود، امن کے قیام اور معمولاتِ زندگی کی بحالی کے عزم پر ثابت قدم ہے۔
