رہنماء پی ٹی آئی اسد قیصر نے کہا کہ محمود اچکزئی یا علامہ ناصر عباس پر اعتماد نہ کرنے کی باتیں غیر ضروری ہیں، جب بانی نے بتا دیا مذاکرات کا اختیار کن افراد کو ہے تو یہ پارٹی کیلئے اٹل فیصلہ ہے۔
نجی ٹی وی سے گفتگو کرتے ہوئے اسد قیصر نے کہا کہ بانی پی ٹی آئی اور پوری جماعت کو محمود اچکزئی اور علامہ ناصر عباس پر مکمل اعتماد ہے، بانی نے اپوزیشن الائنس قیادت کو بات کرنے یا مذاکرات ختم کرنے کا مکمل اختیار دیا ہے، بانی نے کہا اگر محمود اچکزئی چاہیں تو حکومت و اپوزیشن کسی سے بھی بات کریں، بانی نے اس حد تک کہا کہ اگر اپوزیشن قائدین مذاکرات نہ کرنا چاہیں تو بھی ان کو مکمل اختیار ہے، لہٰذا دونوں پر اعتماد نہ کرنے کی باتیں غیر ضروری ہیں۔
انہوں نے کہا کہ جب بانی نے بتا دیا کہ مذاکرات کا اختیار کن افراد کو ہے تو یہ پارٹی کیلئے اٹل فیصلہ ہے۔
اسد قیصر نے واضح کیا کہ اگر مذاکرات ہوئے تو اس میں آئین کی بحالی، ملکی سلامتی اور حق حکمرانی کے اصولوں پر بات کی جائے گی۔
