پشاور ہائیکورٹ نے خیبرپختونخوا میں سینیٹ انتخابات نہ کرانے پر الیکشن کمیشن سے 16جنوری تک جواب طلب کر لیا۔ منگل کو پشاور ہائیکورٹ چیف جسٹس اشتیاق ابراہیم اور جسٹس وقار احمد نے پی ٹی آئی رہنماء اعظم سواتی کی خیبرپختونخوا میں سینیٹ الیکشن نہ کرانے بارے دائر درخواست پر سماعت کی۔ وکیل الیکشن کمیشن نے بتایا کہ سینیٹ الیکشن کے حوالے سے 10دسمبر کو اجلاس ہوا،
ابھی تک اس پر مشاورت جاری ہے، مخصوص نشستوں کی نظر ثانی پٹیشن سپریم کورٹ میں زیرالتوا ہے، اس کو بھی دیکھ رہے ہیں۔چیف جسٹس اشتیاق ابراہیم نے کہا ہم آپ کو دو ہفتے کا وقت دیتے ہیں جس پر وکیل الیکشن کمیشن نے استدعا کی ٹائم تھوڑا زیادہ کریں اس پر تھوڑا وقت لگے گا۔ عدالت نے کہا کہ آپ بتائیں کونسی تاریخ دیں، جس پر وکیل الیکشن کمیشن نے کہا کہ اس کیس کو زیرالتوا رکھیں ہم جواب جمع کرا دیں گے، اس پر چیف جسٹس پشاور ہائیکورٹ نے کہا آپ کو ایسی کھلی چھوٹ بھی نہیں دے سکتے۔بعدازاں عدالت نے 16جنوری تک الیکشن کمیشن سے جواب طلب کرتے ہوئے سماعت ملتوی کر دی۔
