وزیراعلی پنجاب مریم نواز نے کہا ہے کہ عوام میں ترقی کی ضرورت کے بڑھتے شعور کو مثبت رجحان قرار دیتے ہوئے کہا ہے کہ پنجاب میں تیز ترقی کا جدید دور شروع ہوچکا، پائیدار ترقی و موثر ابلاغ لوگوں کی زندگیوں میں بہتری کیلئے کلیدی کردار ادا کر رہے ہیں۔
ورلڈ ڈویلپمنٹ انفارمیشن ڈے کے موقع پر جاری بیان میں مریم نواز نے کہا ہے کہ اس دن کو منانے کا مقصد عوام کی زندگیوں میں بہتری لانے کے عزم کی تجدید ہے، ورلڈ ڈویلپمنٹ انفارمیشن ڈے عوامی مسائل، ترقیاتی ضروریات کی اہمیت کو اجاگر کرنے کا دن ہے۔
انہوں نے کہا کہ پنجاب میں پہلی بار 3ہزار مراکز صحت اور ہسپتالوں کی تعمیر، مرمت اور بحالی کا منصوبہ منفرد ریکارڈ ہے جبکہ مختصر مدت میں 20ہزار سے زائد سڑکوں کی تعمیر و مرمت اس عزم کی ناقابل تردید مثال ہے۔
انہوں نے کہا ہے کہ ستھرا پنجاب، 1100الیکٹرو بسز اور اپنی چھت، اپنا گھر جیسے منصوبے ترقیاتی ابلاغ (ڈویلپمنٹ کمیونیکیشن) کی روشن دلیل ہیں، صحت، تعلیم اور جدید مواصلاتی سہولتوں تک عوام کی رسائی یقینی بنا کر ترقی کے اہداف حاصل کئے جا سکتے ہیں۔
انہوں نے کہا کہ معاشی ترقی اور مثبت تبدیلی کے لیے عوامی معلومات بنیادی کردار ادا کرتی ہیں ،عوام میں ترقی کی ضرورت کا بڑھتا شعور مثبت رجحان ہے پائیدار ترقی وموثر ابلاغ لوگوں کی زندگیوں میں بہتری لانے کیلئے کلیدی کردار ادا کر رہے ہیں۔
