پشاور: خیبرپختونخوا حکومت نے کرپشن کی روک تھام کیلئے پولیس طرز پر اینٹی کرپشن کے ریجن دفاتر قائم کرنے کا فیصلہ کرلیا۔ تفصیلات کے مطابق خیبرپختونخوا حکومت نے کرپشن کی روک تھام کیلئے صوبے میں پولیس طرز پر اینٹی کرپشن کے ریجن دفاتر قائم کرنے کا فیصلہ کیا ہے جس کے تحت اینٹی کرپشن افسران کو کارروائیوں کا مکمل اختیار دیا گیا ہے۔
جاری دستاویز کے مطابق صوبے بھرمیں اینٹی کرپشن نے 10 دفاترکو کم کر کے 6 ریجنز میں تقسیم کیا ہے جن میں پشاور، مردان، مالاکند، ایبٹ آباد، بنوں اورڈی آئی خان شامل ہیں۔
حکام کے مطابق تمام دفاترکے ٹیکنیکل سپورٹ اوراختیارات میں بھی اضافہ کیا گیا ہے جبکہ تمام ریجنز میں متعلقہ افسران کارروائی کے مجاز ہونگے، اینٹی کرپشن نے تمام ریجنل ہیڈکوارٹراوران کے دائرہ اختیارمیں آنیوالے اضلاع کوبھی آگاہ کردیا گیا ہے۔
