صادق آباد: صادق آباد میں کچے کے علاقے میں ڈاکوؤں کی فائرنگ سے 12 پولیس جوانوں کی شہادت کا مقدمہ تھانہ ماچھکہ 131 جرائم پیشہ افراد کیخلاف درج کرلیا گیا۔ تفصیلات کے مطابق صادق آباد کے علاقے ماچھکہ میں ڈاکوؤں کے حملے کے نتیجے میں 12 پولیس جوانوں کی شہادت کا مقدمہ انسپکٹر امجد رشید کی مدعیت میں 131 جرائم پیشہ فراد کیخلاف تھانہ ماچھکہ میں درج کرلیا گیا۔
دہشتگردی،قتل،اغواء سمیت دیگر دفعات کے تحت درج میں کہا گیا ہے کہ پولیس اہلکار کیمپ سے واپسی پر شاہوکوش کے گھر کے پاس پہنچے تو لکھی، منی اور گڈو کوش کی سربراہی میں ملزمان نے سیدھی فائرنگ شروع کردی جس کے نتیجے میں 12 اہلکار شہید اور 9 زخمی ہوگئے جبکہ ڈاکو ایک پولیس اہلکار احمد نواز کو اغواء کر کے ساتھ لے گئے،پولیس کی فائرنگ سے ڈاکو بشیر شر مارا گیا جبکہ گڈو کوش زخمی ہوگیا۔
مقدمے کے مطابق ڈاکوؤں کے پاس راکٹ لانچر، جی 3 اور دیگر اسلحہ بھی موجود تھا جس کے استعمال سے پولیس گاڑیوں کو شدید نقصان پہنچا۔ مقدمے کے مطابق ڈاکو فرار ہوتے ہوئے پولیس کا سرکاری اسلحہ بھی ساتھ لے گئے ہیں۔
