لاہور پولیس نے لاہور ہائیکورٹ کو آگاہ کیا ہے کہ گزشتہ تین سال کے دوران پتنگ بازی کیخلاف 5 ہزار 915 مقدمات درج کر کے 5270 افراد کو گرفتار کیا گیا۔
بسنت کے خلاف زیر سماعت کیس میں سی سی پی او لاہور کی جانب سے پیش کی گئی رپورٹ میں بتایا گیا ہے کہ 2024سے 2026ء تک پتنگ بازی کیخلاف مجموعی طور پر 5ہزار 915مقدمات درج کئے گئے، سب سے زیادہ مقدمات 3ہزار 534سال 2024ء میں درج کئے گئے، 2025 میں پتنگ بازی کیخلاف 1ہزار 918مقدمات درج ہوئے۔
سال 2024میں پتنگ بازی کے واقعات میں 10افراد زخمی ہوئے، 2025میں 2افراد زخمی اور ایک جاں بحق ہوا جبکہ 2026میں تاحال کوئی جانی نقصان رپورٹ نہیں ہوا۔
رپورٹ کے مطابق تین سالوں میں پتنگ بازی میں ملوث 5ہزار 270افراد کو گرفتار کرکے 90ہزار سے زائد پتنگیں اور 5ہزار سے زائد کیمیکل اور دھاتی ڈوریں ضبط کی گئیں۔
رپورٹ میں کہا گیا ہے کہ پتنگ بازی سے متعلق بنائے گئے قانون پر سختی سے عمل درآمد کروایا جائے گا، کسی بھی غیر قانونی اقدام کیخلاف فوری اور موثر کارروائی عمل میں لائی جائے گی۔
