ملک کے بالائی علاقوں میں شدید برفباری اور سرد موسم کے باعث نظامِ زندگی مفلوج ہو کر رہ گیا جبکہ محکمہ موسمیات نے سردی و برفباری کی لہر آئندہ چند روز جاری رہنے کی پیشگوئی کردی، رابطہ سڑکیں بند ہونے سے سینکڑوں افراد محصور ہو کر رہ گئے، پاک فوج اور سول انتظامیہ کی جانب سے بڑے پیمانے پر ریسکیو اور امدادی آپریشن جاری ہیں، حکام نے شہریوں اور سیاحوں کو متاثرہ علاقوں کے سفر سے گریز کی ہدایت کردی۔
ذرائع کے مطابق آزاد کشمیر، خیبرپختونخوا اور گلگت بلتستان کے بیشتر اضلاع میں کئی کئی فٹ برف پڑ چکی ہے، آزاد کشمیر کے مختلف علاقوں میں گزشتہ رات سے جاری شدید برفباری نے معمولاتِ زندگی مفلوج کر دیا ہے، وادی نیلم، اپر نیلم، اٹھ مقام، سدھنوتی، باغ اور ہٹیاں بالا سمیت متعدد بالائی علاقوں میں مسلسل برفباری کے باعث سڑکیں مکمل طور پر بند ہو چکی ہیں۔
حویلی کی حدود میں شدید برفباری کے دوران ایمبولینس سمیت 25 کے قریب گاڑیاں برف میں پھنس گئیں جن میں خواتین اور بچوں سمیت تقریبا 100 افراد سوار تھے۔
برف میں پھنسے مسافروں کی اطلاع ملتے ہی پاک فوج نے فوری طور پر ریسکیو آپریشن شروع کیا اور انتہائی دشوار موسمی حالات میں کارروائی کرتے ہوئے 32مسافروں کو بحفاظت نکال کر محفوظ مقامات پر منتقل کیا۔
ریسکیو آپریشن کے دوران ایک ایمبولینس میں موجود دو میتوں کو بھی نکال لیا گیا، جس پر لواحقین نے پاک فوج کی بروقت کارروائی کو سراہا۔
مظفرآباد میں بھی کئی سالوں بعد برفباری ریکارڈ کی گئی ہے جس سے سردی کی شدت میں غیر معمولی اضافہ ہوگیا ہے، وادی نیلم میں شدید برفباری کے باعث 2 مکانات منہدم ہو گئے، تاہم خوش قسمتی سے کسی جانی نقصان کی اطلاع نہیں ملی۔
برفباری اور لینڈ سلائیڈنگ سے اہم شاہراہیں بند ہو گئیں جس سے مقامی آبادی کو شدید مشکلات کا سامنا ہے۔شدید برفباری اور تیز ہواں کے باعث آزاد کشمیر کے مختلف علاقوں میں بجلی کا نظام بری طرح متاثر ہوا ہے، کئی مقامات پر بجلی کے پولز گر گئے، تاریں ٹوٹنے کے باعث گزشتہ 24گھنٹوں سے بجلی کی فراہمی معطل ہے۔
خیبرپختونخوا کے بالائی علاقوں میں بھی وقفے وقفے سے برفباری کا سلسلہ جاری ہے، وادی کاغان میں برفباری کے باعث رابطہ سڑکیں بند ہو گئیں جس کے بعد ضلعی انتظامیہ نے سیاحوں کے داخلے پر پابندی عائد کر دی، کسی بڑے حادثے سے بچنے کیلئے مزید آنیوالے سیاحوں کو بالاکوٹ میں روک لیا گیا ہے۔
دیربالا، کمراٹ اور لواری ٹنل میں بھی شدید برفباری کے باعث آمدورفت معطل ہو گئی ہے، برف جمنے اور پھسلن کے باعث گاڑیوں کی نقل و حرکت ممکن نہیں رہی، بعض علاقوں میں اشیائے خورونوش کی قلت کا خدشہ ظاہر کیا جا رہا ہے۔
ملاکنڈ میں کئی سالوں بعد برفباری کے باعث سردی کی شدت میں اضافہ ہوگیا ہے بعض مقامات پر برف کے وزن اور تیز ہواں کے باعث درخت گرنے سے ٹریفک روانی متاثر ہوئی ہے۔
خیبر میں برفباری کے باعث پھنسے افراد کو نکالنے کیلئے ریسکیو آپریشن جاری ہے۔
ڈپٹی کمشنر خیبر کے مطابق پھنسے ہوئے افراد کو پائندہ چینہ اسکول اور ہاسٹل منتقل کر دیا گیا ہے، جہاں انہیں عارضی رہائش اور ضروری سہولیات فراہم کی جا رہی ہیں۔
علاوہ ازیں شانگلہ ٹاپ میں 22 گھنٹوں سے برف میں پھنسے 4 سیاحوں کو بھی کامیاب ریسکیو آپریشن کے بعد محفوظ مقام پر منتقل کر دیا گیا۔
گلگت بلتستان میں شدید برفباری کے باعث صورتحال سنگین ہو گئی ہے، چلاس اور اپر کوہستان میں برفباری اور لینڈ سلائیڈنگ کے باعث شاہراہ قراقرم مختلف مقامات پر بند کر دی گئی ہے، شاہراہ بند ہونے سے سینکڑوں مسافر اور مال بردار گاڑیاں پھنس گئیں، جس کے باعث اشیائے ضروریہ کی ترسیل بھی متاثر ہو رہی ہے۔
ضلع استور میں شدید برفباری کے باعث علاقے کا ملک بھر سے زمینی رابطہ منقطع ہو گیا ہے جبکہ راما میڈوز، دیوسائی، نانگا پربت اور برزل ٹاپ میں 5سے 6فٹ تک برف پڑ چکی ہے، مشرف چوک میں برفانی تودہ گرنے سے سڑک بند ہو گئی، جسے کھولنے کیلئے بھاری مشینری طلب کر لی گئی ہے۔
ہنزہ اور نگر میں بھی برفباری کے باعث رابطہ سڑکیں بند ہیں، جس سے مقامی آبادی کو شدید مشکلات کا سامنا ہے۔
وادی چیپورسن میں خیموں میں مقیم زلزلہ متاثرین کو شدید سردی اور مسلسل برفباری کے باعث سخت حالات کا سامنا کرنا پڑ رہا ہے، امدادی ادارے متاثرین تک ضروری سامان پہنچانے کیلئے متبادل راستوں اور فضائی ذرائع پر غور کر رہے ہیں۔ مری میں بھی شدید برفباری کے باعث کئی سیاح پھنس گئے ہیں، مقامی انتظامیہ دیگر اداروں کی مدد سے متاثرین کی محفوظ مقامات پر منتقلی کیلئے کوشاں ہے۔
ملک کے مختلف حصوں میں شدید برفباری کے پیش نظر ضلعی انتظامیہ، ریسکیو ادارے اور پاک فوج ہائی الرٹ ہیں، انتظامیہ نے شہریوں اور سیاحوں کو غیر ضروری سفر سے گریز، موسمی صورتحال سے باخبر رہنے اور ہدایات پر عمل کرنے کی تاکید کی ہے۔
دوسری جانب محکمہ موسمیات نے چند روز تک بالائی علاقوں میں سردی اور برفباری کا سلسلہ جاری رہنے کی پیشگوئی کی ہے۔
