اسلام آباد ٹریفک پولیس نے شہریوں کو ڈرائیونگ لائسنس کے حصول میں یکم اکتوبر تک مہلت دیتے ہوئے واضح کیا ہے کہ مقررہ تاریخ کے بعد بغیر لائسنس ڈرائیونگ کرنیوالے کیخلاف سخت کارروائی کی جائے گی۔
جاری بیان میں چیف ٹریفک آفیسر کیپٹن (ر) حمزہ ہمایوں نے کہا ہے کہ شہریوں کی سہولت کیلئے ڈرائیونگ لائسنس کے حصول میں یکم اکتوبر تک توسیع کردی گئی ہے، یکم اکتوبر کے بعد بغیر ڈرائیونگ لائسنس گاڑی یا موٹر سائیکل چلانے پر مقدمہ درج ہوگا، ڈرائیور کو گرفتار کیا جائے گا اور گاڑی بند کر دی جائے گی۔
انہوں نے کہا کہ یہ کارروائی بلاتفریق ہوگی اور شہری چاہے کوئی بھی ہو، انہیں کوئی رعایت نہیں دی جائے گی۔چیف ٹریفک آفیسر نے کہا کہ شہریوں کی سہولت کیلئے فیض آباد ٹریفک آفس، ایف 6 سہولت مرکز اور ٹریفک سہولت وینز کے ذریعے لائسنس بنوانے کی سہولت فراہم کی جا رہی ہے۔
انہوں نے کہا کہ ایک مہذب شہری ہونے کا ثبوت یہی ہے کہ ڈرائیونگ لائسنس حاصل کیا جائے تاکہ قانونی کارروائی سے بچا جا سکے۔ انہوں نے کہا کہ بغیر ڈرائیونگ لائسنس گاڑی چلانا اپنی اور دوسروں کی جان کیلئے خطرہ ہے اور اسلام آباد ٹریفک پولیس کسی بھی شہری کو دوسروں کی زندگی کو خطرے میں ڈالنے کی اجازت نہیں دے گی۔
انہوں نے ہدایت کی کہ شہری ہمیشہ ڈرائیونگ لائسنس کی فزیکل کاپی اپنے ساتھ رکھیں، ڈیجیٹل کاپی قابل قبول نہیں ہوگی۔
