سپریم کورٹ، کپڑوں کی پیکنگ کیلئے درآمدی خام مال پر عائد ریگولیٹری ڈیوٹی کیخلاف اپیل خارج اسلام آباد: سپریم کورٹ نے کپڑوں کی پیکنگ کیلئے درآمدی خام مال پر عائد ریگولیٹری ڈیوٹی کیخلاف اپیل خارج کر دیں۔تفصیلات کے مطابق سپریم کورٹ میں جسٹس منصور علی شاہ، جسٹس عائشہ ملک اور جسٹس عقیل عباسی پر مشتمل تین رکنی بینچ نے کپڑوں کی پیکنگ کیلئے درآمدی خام مال پر عائد ریگولیٹری ڈیوٹی پر ہائیکورٹ فیصلے کیخلاف اپیل پر سماعت کی۔ درخواست گزار کے وکیل نے موقف اپنایا کہ پیکنگ کے خام مال پر ریگولیٹری ڈیوٹی غیر مساوی سلوک ہے۔جسٹس منصور علی شاہ نے کہا کہ وفاقی حکومت ریگولیٹری ڈیوٹی عائد کر سکتی ہے، ڈیوٹی عائد کرنا فیڈریشن کا پالیسی معاملہ ہے، یہ وفاقی حکومت نے طے کرنا ہے کس پر ریگولیٹری ڈیوٹی لگانی ہے۔جسٹس عائشہ ملک نے کہا کہ ہمارا کام مالیاتی پالیسی کو دیکھنا نہیں ہے جبکہ جسٹس عقیل عباسی نے کہا کہ ہائیکورٹس نے بھی آپ کی اپیلیں خارج کی ہیں۔ وکیل نے کہا کہ اسی نوعیت کا ایک اور خام مال ہے جس پر ریگولیٹری ڈیوٹی عائد نہیں کی گئی۔جسٹس منصور علی شاہ نے کہا کہ ٹھیک ہے پھر آپ وہی خام مال منگوا لیں جن پر ریگولیٹری ڈیوٹی نہیں، مالیاتی پالیسی میں مداخلت نہیں کریں گے، سپریم کورٹ بطور عدالت ریگولیٹری ڈیوٹی سے متعلق مذاکرات نہیں کر سکتی۔بعد ازاں عدالت نے ہائی کورٹ کے فیصلے کیخلاف اپیل خارج کر دی۔