لاہور: وفاقی وزیر منصوبہ بندی احسن اقبال نے کہاہے کہ انجینئرز کو ملکی ترقی کی کنجی قرار دیتے ہوئے کہاہے کہ مسلح افواج نے بھارت کے چہرے سے میک اپ اتار دیا، معرکہ حق کے بعد معرکہ ترقی میں بھی دشمن کو شکست دینا ہوگی، 2035ء تک معیشت ایک ٹریلین ڈالر تک لے جانے کیلئے سب کو کردارادا کرنا ہوگا۔
لاہور میں تقریب سے خطاب کرتے ہوئے احسن اقبال نے کہا کہ معرکہ حق ایک شاندار کامیابی تھی ، جس نے پاکستان کو دنیا کے سامنے سرخرو کیا۔ انہوں نے کہا کہ پاکستان کی بہادر مسلح افواج نے بھارت کے چہرے سے میک اپ اتار دیاہے۔ انہوں نے کہا کہ اب معرکہ حق کے بعد معرکہ ترقی کا آغاز ہوگیا ہے جسے ہمیں جیتنا ہوگا۔
انہوں نے کہا کہ معرکہ ترقی اڑان پاکستان کی شکل میں ہر شہری کے سامنے ہے۔ انہوں نے کہا کہ ہم نے2035ء تک پاکستانی معیشت کو ایک ٹریلین ڈالر تک لے کر جانا ہے، ہمیں معاشی میدان میں بھی بھارت کو چاروں شانوں چت کرنا ہوگا۔
انہوں نے کہا کہ سب پاکستانیوں کو پائیدار پاکستان میں اپنا کردار ادا کرنا چاہئے، معرکہ تحقیق اور ترقی کیلئے بھرپور کام کرنے کی ضرورت ہے۔ انہوں نے کہا کہ سویت یونین کے پاس اسلحہ اور فوج تھی مگر معیشت کمزور ہونے کی وجہ سے ناکامی کا سامنا کرنا پڑا۔
انہوں نے کہا کہ میرا تعلق کسی جاگیر دار نہیں ،مڈل کلاس گھرانے سے ہے، کوئی بھی نوجوان انجینئر پاکستان کے کسی عہدے پر جا سکتا ہے، پاکستان کی ترقی کے ہر راستے کے محور انجینئرز ہیں۔
انہوں نے کہا کہ پاکستان کی ایکسپورٹ میں اضافے کا سفر انجینئرز کی سپورٹ کے بغیر مکمل نہیں ہے۔ انہوں نے کہا کہ انجینئرز پاکستان کی فوڈ سیکیورٹی اور زراعت میں بھرپور کردار ادا کر سکتے ہیں ، نوجوان کو آگے بڑھ کر ملکی ترقی کیلئے کردارادا کرنا چاہئے۔
