کینیا کے صدر ولیم روٹو (دائیں سے دوسرے) نیروبی دریا کے ماحولیاتی بحالی منصوبے کا سنگ بنیاد رکھنے کی تقریب میں شریک ہیں-(شِنہوا)
نیروبی(شِنہوا)کینیا کے صدر ولیم روٹو نے کہا ہے کہ ان کے چین کے حالیہ سرکاری دورے کا مقصد کینیا کی جدیدیت کی مہم کو تیز کرنے کے لئے دونوں ممالک کی 6 دہائیوں پر محیط شراکت داری کو مضبوط بنانے پر توجہ مرکوز کرنا ہے۔
اپنے دورے سے قبل شِنہوا کے ساتھ ایک انٹرویو میں روٹو نے کہا کہ روایتی تعلقات نے دوطرفہ تعلقات کی ترقی کے لئے ایک ٹھوس بنیاد رکھی ہے۔ انہوں نے مزید کہا کہ کینیا پیداوار، زراعت ، نقل و حمل اور توانائی جیسے بڑے شعبوں میں اپنی جدیدیت کو تیز کرنے کی کوششوں میں گہرے تعاون کی توقع کرتا ہے۔
صدر ولیم روٹو نے اس دورے سے توقعات کا اظہار کیا۔ ان کے مطابق چینی فریق کے ساتھ باہمی دلچسپی کے امور پر تبادلوں سے دوطرفہ تعلقات میں اضافہ ہوگا اور دونوں ممالک کے عوام کو مزید فوائد حاصل ہوں گے۔
روٹو نے چین کے مجوزہ بیلٹ اینڈ روڈ انیشی ایٹو (بی آر آئی) میں ایک اہم شراکت دار کے طور پر کینیا کے کردار پر زور دیا۔ صدر روٹو نے کہا کہ کینیا میں نیروبی ایکسپریس وے اور ممباسا-نیروبی سٹینڈرڈ گیج ریلوے جیسے بی آر آئی تعاون کے فلیگ شپ منصوبے کینیا اور چین کی شراکت داری اور باہمی فوائد کا ثبوت ہیں جس نے مقامی رابطے کو بہتر بنایا ہے اور مشرقی افریقہ میں علاقائی انضمام کو فروغ دیا ہے۔
