اسلام آباد میں چینی سفارتخانے کے زیر اہتمام بہار میلے کی تقریب کا انعقاد

اسلام آباد (شِنہوا) پاکستان میں چینی سفارت خانے نے "نیا چینی سال،چین-پاکستان ساتھ ساتھ” کے عنوان سے بہار میلے کی تقریب کا انعقاد کیا ۔

پاکستانی معاشرے کے مختلف حصوں کے نمائندوں، بیرون ملک مقیم چینی باشندوں، چینی کاروباری شخصیات اور میڈیا نے تقریب میں شرکت کی۔

پاکستان میں چین کے سفیر جیانگ زائی ڈونگ  نے گھوڑے کا نیا چینی سال مل کر منانے کے لئے پاکستانی دوستوں کو چین کے سفارت خانے میں خوش آمدید کہا۔ انہوں نے کہا کہ اس سال بہار تہوار کے دوران نئے چینی سال کو چین جا کر منانا غیرملکی دوستوں میں ایک نیا رجحان بن گیا ہے۔ انہوں نے چین میں  پرسکون، ہم آہنگ اور خوشگوار ماحول میں مزیدار کھانوں، خوبصورت مناظر اور  شاندار وقت  سے لطف اٹھایا ہے۔

انہوں نے توقع ظاہر کی کہ پاکستانی دوست چین کے سفارت خانے میں شاندار نیا چینی سال منائیں گے اور چین-پاکستان دوستی کا نیا باب مل کر رقم کریں گے۔

پاکستانی حکومت کی نمائندگی کرتے ہوئے وزیر پٹرولیم علی پرویز ملک نے چینی عوام کو بہار میلے کی مبارکباد دی اور نئے سال کے دوران چینی دوستوں اور چین کی ترقی کے لئے نیک خواہشات کا اظہار کیا۔

مہمانوں نے چینی چائے کے فن سے لطف اٹھایا، ڈمپلنگ بنانے کا طریقہ سیکھا اور موقع پر مختلف مظاہرے دیکھے۔ پاکستان کی نیشنل یونیورسٹی آف ماڈرن لینگویجز کے طالب علم محمد کامران نے سٹیج پر ایک قدیم چینی نظم ’’بہار کی رات میں دریا کے اوپر چاند‘‘ سنائی۔

انہوں نے کہا کہ بہار میلے کے دوران اپنے ہی ہاتھوں سے ڈمپلنگ بنانا ان کے لئے بہت پرجوش تجربہ تھا۔ انہوں نے امید ظاہر کی کہ دونوں ممالک کے عوام اپنے اپنے روایتی تہواروں کے ذریعے تبادلے مضبوط کریں گے اور دوستی کو فروغ دیں گے۔