غزہ میں اسرائیلی فائرنگ کے دوران پھنس جانیوالی فلسطینی بچی ہند رجب کے آخری لمحات سے متاثر ہو کر بنائی گئی فلم ”دی وائس آف ہند رجب” کو بہترین بین الاقوامی فلم کی کیٹگری میں آسکر کیلئے نامزد کر دیا گیا ہے۔
غیر ملکی میڈیا کے مطابق فلم کے ہدایتکار تونیسی فلمساز کاوتر بن ہانیا ہیں، فلم سعودی عرب کے ریڈ سی فنڈ کے تعاون سے بنائی گئی ہے جس کی کہانی ہند رجب حماد کے گرد گھومتی ہے جو گزشتہ سال غزہ سٹی میں اسرائیلی فوج سے فرار کی کوشش کر رہی تھیں، وہ اپنے چھ رشتہ داروں کے ہمراہ گاڑی میں سوار تھیں کہ انکی گاڑی پر فائرنگ کر دی گئی، اس اسرائیلی حملے میں صرف وہی زندہ بچ سکی تھیں تاہم انہیں بعد میں گولی مار کر ہلاک کر دیا گیا، مدد کیلئے ریڈ کریسنٹ ریسکیو سروس کیساتھ انکی ریکارڈ شدہ آخری کالز نے عالمی برداری کو اسرائیل کیخلاف اشتعال دلایا، فلم کے ایگزیکٹو پروڈیوسرز میں کئی مشہور نام شامل ہیں جن میں اداکار جواکین فینکس اور بریڈ پٹ اور آسکر جیتنے والے ہدایتکار جوناتھن گلیزر (فلم دی زون آف انٹرسٹ) اور میکسیکو کے الفونسو کورون(فلم روما)شامل ہیں۔
آسکر نامزدگی کے اعلان کے بعد ریڈ سی فلم فانڈیشن نے انسٹاگرام پر بیان جاری کیا جس میں کہا گیا ہے ہمیں یہ اعلان کرتے ہوئے فخر محسوس ہو رہا ہے کہ کاوتر بن ہانیا کی فلم دی وائس آف ہند رجب 2026کے آسکرز میں بہترین بین الاقوامی فیچر فلم کیلئے نامزد ہوئی ہے، نامزدگی فلم کے تخلیقی وژن کی مضبوطی اور ٹیم کی محنت کی عکاسی کرتی ہے جس نے اسے حقیقت میں بدل دیا، ہمیں فخر ہے کہ ہم نے اس میں تعاون کیا اور اسے سال کی سب سے نمایاں بین الاقوامی فلموں میں سراہتے ہوئے دیکھا، فلم ستمبر 2025میں وینس انٹرنیشنل فلم فیسٹیول میں پیش کی گئی چند دن بعد دی وائس آف ہند رجب کو سلور لائن گرینڈ جیوری پرائز دیا گیا جو فیسٹیول کا دوسرا سب سے بڑا اعزاز ہے۔
