پنجاب میں فلم انڈسٹری کے فروغ کیلئے پنجاب فلم ڈویلپمنٹ اتھارٹی تشکیل دینے کا فیصلہ کر لیا گیا ہے اور اس کیلئے پنجاب اسمبلی میں پنجاب فلم ڈویلپمنٹ اتھارٹی ایکٹ 2025 پیش کر دیا گیا ہے، اتھارٹی کے ذریعے فلمسازی، ڈرامہ اور ڈاکیومنٹریز کی سرپرستی کی جائیگی، نئی فلم پالیسی، قواعد و ضوابط اور لائسنسنگ کا جامع نظام متعارف کروایا جائیگا جبکہ فلمسازوں کو سہولیات، اجازت ناموں اور ون ونڈو آپریشن کی سہولت فراہم کی جائیگی، مجوزہ بل میں مقامی اور غیر ملکی سرمایہ کاری کے فروغ کیلئے خصوصی مراعات دینے، فلم سٹوڈیوز، فلم سٹی اور پوسٹ پروڈکشن سہولیات کے قیام کی راہ ہموار کرنے کی شقیں شامل ہیں، نئے ٹیلنٹ کی تربیت کیلئے ٹریننگ پروگرامز بھی شروع کئے جائینگے جبکہ فلم انڈسٹری کیلئے فنڈنگ، گرانٹس اور سبسڈی کا نظام بھی متعارف کروایا جائیگا، بل کے تحت فلم کے ذریعے پنجاب کی ثقافت، سیاحت اور مثبت تشخص کو اجاگر کیا جائیگا، پنجاب فلم ڈویلپمنٹ اتھارٹی کو فلم انڈسٹری سے متعلق شکایات اور مسائل کے حل کا اختیار بھی حاصل ہوگا۔
ذرائع کے مطابق بل کو دو ماہ کیلئے متعلقہ کمیٹی کے سپرد کر دیا گیا ہے جو مقررہ مدت میں اپنی رپورٹ پیش کریگی، کمیٹی کی منظوری کے بعد بل پنجاب اسمبلی سے منظور کروایا جائیگا جبکہ حتمی منظوری گورنر پنجاب دینگے۔
