راولپنڈی کی ایک عدالت نے مشہور ٹک ٹاکر ایمان فاطمہ کے بال کاٹنے کے کیس میں دو ملزمان مسماة ثناء اور جابر خان کی عبوری ضمانتیں مسترد کردیں اور دونوں ملزمان کمرہ عدالت سے فرار ہوگئے جبکہ پولیس ہتھکڑیاں لئے عدالتی احاطہ میں منہ دیکھتی رہ گئی۔
ذرائع کے مطابق سماعت راولپنڈی کی مقامی عدالت میں ہوئی، دوران سماعت وکیل صفائی نے استدعا کی کہ دونوں ملزمان کی ہائیکورٹ سے عبوری ضمانتیں کرائی جائیں گی، پراسیکیوٹر نے عدالت کو بتایا کہ ملزمان شامل تفتیش ہی نہیں ہوئی تو بے گناہ کیسے ہیں، لڑکی کے بال جبری کاٹے گئے وہ ڈر سے سامنے نہیں آرہی، بال کاٹنا کسی بھی صورت معمولی قابل ضمانت جرم نہیں بنتا، ایڈیشنل ڈسٹرکٹ اینڈ سیشن جج اکرام الحق چودہری نے ملزمان کی عبوری ضمانتیں مسترد کرتے ہوئے کہا کہ لڑکی کے بال کاٹنا سنگین واقہ ہے عبوری ضمانت نہیں دی جاسکتی، دونوں ملزمان پولیس پاس شامل تفتیش ہوں تاہم، ملزمان عدالت کے فیصلہ سے چند منٹ قبل کمرہ عدالت سے نکلے اور واپس نہیں آئے۔
