خیبر پختونخوا حکومت نے ضلع کرم میں جاری کشیدگی کے باعث پشاور آمد و رفت کے لیے ہیلی کاپٹر سروس شروع کردی۔ پریس سیکریٹری برائے وزیر اعلی خیبر پختونخوا کی جانب سے جاری بیان میں کہا گیا کہ ضلع کرم میں جاری کشیدگی کے باعث لوگوں کو آمد ورفت میں مشکلات کا سامنا ہے،
وزیر اعلی علی امین گنڈا پور کی خصوصی ہدایات پر کرم کے لئے ہیلی کاپٹر سروس شروع کردی گئی ہے۔ بیان میں بتایا گیا کہ گزشتہ روز صوبائی حکومت کے ہیلی کاپٹر ایم آئی 17 نے پشاور سے کرم کے لیے دو پروازیں کیں، ان پروازوں کے ذریعے پاراچنار سے 53 افراد کو پشاور منتقل کیا گیا، ان افراد میں 14 مریض بھی شامل تھے۔
ان کا کہنا تھا کہ علاقے میں ادویات کی ضروریات پوری کرنے کے لئے وزیر اعلی کی خصوصی ہدایات پر ہیلی کاپٹر کے ذریعے ادویات کی فراہمی کا عمل بھی جاری ہے، گزشتہ روز پشاور سے 1850 کلوگرام ادویات پاراچنار پہنچائی گئیں، ان ادویات کی مالیت ایک کروڑ 20 لاکھ روپے ہے۔
بیان میں کہا گیا کہ وزیر اعلی کی ہدایات کرم میں ادویات کی فراہمی کے لئے ہیلی کاپٹر کی کل سات پروازیں ہوئیں، ان پروازوں کے ذریعے 6 کروڑ روپے مالیت سے زائد کی ادویات کرم پہنچائی گئیں ہیں۔
