وزیراعلی سندھ مراد علی شاہ نے رواں سال زرعی انکم ٹیکس کی شرح برقرار رکھنے کا اعلان کرتے ہوئے کہا ہے کہ چھوٹے کاشتکاروں کو 55 ارب روپے کا پیکج دیں گے، غریب کسانوں کو مراعات کی نگرانی محکمہ زراعت کرے گا۔
کراچی میں پریس کانفرنس کرتے ہوئے مراد علی شاہ نے کہا کہ ہمارے پاس صوبے کے چھوٹے کاشتکاروں کا ڈیٹا موجود ہے، سندھ میں اضافی سبسڈی پیکج کے تحت چھوٹے کاشتکاروں کو 55 ارب روپے کا پیکج دیں گے۔
انہوں نے کہاکہ گندم کی امدادی قیمت 4 ہزار روپے فی من سے کم نہیں ہونی چاہیے، وفاق کی جانب سے صوبائی حکومتوں کو گندم خریداری کی اجازت کامیابی ہے۔
انہوں نے کہا کہ کسانوں کو مراعات دے کر چاہتے ہیں کہ وہ زیادہ گندم پیدا کریں، اتنا اسٹاک ہو کہ گندم امپورٹ نہ کرنی پڑے، اس وقت محکمہ خوراک سندھ کے پاس 12 لاکھ 65 ہزار ٹن گندم ذخیرہ ہے۔
وزیراعلی سندھ نے کہا کہ حکومت اور دیگر اسٹیک ولڈرز کے پاس مجموعی طور پر 20 لاکھ ٹن گندم ہے ۔
