لاہور: بانی پی ٹی آئی عمران خان کی ہمشیرہ علیمہ خان نے کہا ہے کہ سکیورٹی اہلکار میرے بیٹے کا گھیراو کرکے گاڑی سے نکال کر لے گئے، اگر آپ کا خیال ہے کہ ہم ڈرجائیں گے توایسا نہیں ہے، ہمارا بھائی پاکستان میں حقیقی آزادی کی بات کر رہا ہے، حقیقی آزادی کی جدوجہد میں ہمیں کوئی ڈر نہیں، ہم سب لوگ حق کیساتھ کھڑے ہیں۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا ۔ بیٹوں کی گرفتاری کے بعد ردعمل دیتے ہوئے انہوں نے کہا کہ یہ سب کچھ بانی پی پی ٹی آئی کے اور ہم پر پریشر ڈالنے کی حرکت ہو سکتی ہے، اگر آپ کا خیال ہے کہ ہم ڈر جائیں گے تو ایسا نہیں ہے، ہم عظیم مقصد کے لیے اپنے بھائی کا ساتھ دے رہے ہیں۔
ان کا مزید کہنا تھا کہ مجھ پر80 مقدمات درج ہیں، ہمیں پتہ ہے کسی بھی وقت گرفتار ہو سکتے ہیں، حکومت کی بوکھلاہٹ اورخوف صاف نظر آرہا ہے۔
علیمہ خان نے کہا کہ بانی کی ضمانت پر خوشیاں منانے والوں کو گرفتار کیا جا رہا ہے، ہم سب نے مل کر اپنے ملک کو بچانا ہے، عمران خان نے کہا یہ مشکل وقت ہے اس کے بعد روشنی ہے، بانی نیکہا ہے کہ گھبرانا نہیں۔
